VIM LI CAS YUAV TSUM NTSEEG

VAJTSWV?

Phaunkauj 39:4; 119:19, 27, 39

Vim neeg txojsia tsis ruaj tsis khov By Rev. Nengmay Vang

Introduction: Thaum peb mus ua qhua rau lwm lub nroog, qee zaum peb tseem xav xav nyob sijhawm twb tag lawm, ces peb yuav tau rovqab. Qee zaum peb mus txog ntua peb tsis xav nyob kiag li, tiamsis ho yuav tau nyob ntev kom txog sijhawm. Cov uas tsis tshua xav nyob qee leej txawm nyiag kev khiav rov qab, tiamsis feem coob yuav tau nyob raws li txoj haujlwm.

Question: Vim li cas koj yuav tsum los ntseeg Vajtswv?

Reason: A. Lub neej ntiaj teb no tsis ruaj tsis khov, peb los nyob li ua qhua xwb, tsis ntev yuav rov mus tsev (1 Petus 2:11-12) Txhob pub kev txhaum kav lub siab. Txawm yogh nub no muaj neeg thuam nej los lwm hnub lawv yuav qhuas Vajtswv vim nej tes haujlwm zoo.

B. Txojsia no yuav plojtuag mus ib hnub. Peb yuav tsum npaj nrhiav txojsia ntev dhawv ib txhis, peb thiaj li tsis plam txoj kev cia siab (Yaxayas 28:16). Vajtswv sau leejtwg npe tseg lawm, tus ntawd yuav tsis plam kev cia siab. Tsis txhob cia siab rau ntiaj teb no, tsis txhob cia siab rau cov neeg txawj khawvkoob, txawj ua dab, lawv dag nej noj nej haus, nej yuav tsis muaj lub chaw cia siab tau. Lawv tsuas thuam nej, hem nej xwb.

Cia peb kawm txog peb txojsia hnub no saib tom ntej yuav zoo li cas:

I. Leej twg puas paub yus yuav nyob hov ntev?

(Phaunkauj 39:4)

Ncontsoov: Koj thiab kuv yuav nyob qhov no tsis ntev. Peb tsis txhob vuag peb tes dejnum ntau dhau es nco tsis txog peb lub sijhawm luv luv no. Txhob muab peb khis tseg dhau es tsis nrhiav txojsia mus ib txhis. Rau qhov thaum txog sijhawm lawm, txawm koj xav nyob npaum li cas los koj yeej nyob tsis tau. Tej koj xav koj yeej ua tsis tau txhua yam. Txojsia tsis yog koj tug. Tsuas tshuav ib txoj kev rau koj xaiv lawm xwb: Nrhiav Vajtswv thiab nug Vajtswv saib, koj tshuav sijhawm ua Vajtswv dejnum hov ntev. Koj yuav tsum ua yam twg kom tiav raws li txoj haujlwm uas Vajtswv txib koj los nyob no.

Phaunkauj 39:4 Vajntxwv Daviv nug Vajtswv li no:

- Tus Tswv, kuv yuav ua neej nyob hov ntev?

- Thaum twg kuv mam li tuag?

- Thov koj qhia rau kuv saib?

- Kuv xav paub tias, kuv txojsia yuav tu thaum twg?

Vajntxwv Daviv yeej tsis txawv koj/kuv hlo li. Nws yeej tsis txawv cov ntseeg thiab cov tsis ntseeg. Neeg txhua tus puavleej xav paub tej uas Daviv nug Vajtswv no thiab. Koj puas xav paub cov sijhawm li no thiab:

1. Koj puas xav paub tias koj nyob ntev npaum li cas?

2. Xyoo twg, hnub twg thiab sijhawm twg koj yuav tuag?

3. leej twg thiaj paub koj lub neej tom ntej?

4. Koj yuav tuag nyob qhov twg?

Twb yog vim koj/kuv tsis paub teb cov lus nug saum no, peb thiaj li los ntseeg Vajtswv. Hnub no koj nyob lub tsev no, hauv lub zos no thiab nrog sawvdaws zoo siab hlo, tabsis koj puas paub tagkis koj puas yuav tau nrog lawv nyob lawm?

Example: Kxf. Ntsuabxwm ib txwm pheej tuaj xyuas peb thoob plaws txhua lub zos, tiamsis nim no Vajtswv twb coj nws mus lawm, nws tsis tau nyob qhov no lawm.

Vim koj/kuv yug los ua neeg, peb puavleej nco tsis tau hais tias peb lub teb lub chaw uas peb tawm los lawd nyob qhov twg, zoo li cas lawm. Thaum peb yug los ua neeg peb ciali tsis paub txoj kev lawm. Yog li thaum ib tug tuag, cov pog cov yawg thiaj xav hais tias yuav tsum muaj tus neeg tuaj qhuab-ke rau tus tuag, nyob tsam nws tsis paub rov qab. Qhov lawv ua li ntawd vim lawv yeej tsis paub qhov tseeb tiag tiag hais tias neeg los qhov twg los li. Lawv muab neeg tej ntsujplig xa rov mus rau Dab lawm. Yog li thaum peb tau hnov txojmoo zoo qhia hais tias “Muaj Vajtswv, muaj ntuj Ceeb-tsheej, muaj tub tuag teb uas yog ntuj txiag teb tsaus tiag. Peb los kawm kom peb paub qhov tseeb thiab paub tag nrho yav tom ntej uas peb tseem tsis tau pom. Thaum peb kawm txaus thiab paub meej, peb thiaj li los ntseeg Vajtswv.

Peb txhua tus los nyob ntiaj teb no yeej zoo li tuaj ua qhua xwb tiag tiag li. Cia peb nyeem Vajtswv phau ntawv, Phaunkauj 119:19 saib hais li cas. Vajntxwv Daviv hais li no:

Kuv tsuas ua neej nyob ib nyuag ntus xwb (a); thov koj txhob npog tsis pub kuv paub txog koj tej lus samhwm (b)

Yog koj xav hais tias tsis tas yuav ntseeg Vajtswv li, lossis tsis xav paub txog Vajtswv, lossis xav hais tias, tsis muaj Vajtswv li. Kuv xav nug koj li no:

1. Koj puas tsis txawj mob, tsis laus thiab tsis tuag?

2. Koj puas paub tias tom qab tuag lawm, koj yuav mus nyob qhov twg? Tsuas muaj ob txoj kev, txoj koj tsis tas xaiv yog Dab txoj, tuag hnub twg mus qhov ntawd, txoj ob yog cia koj xaiv, txoj ntawd yog Vajtswv txoj.

Koj xaiv txoj tsis tas ntseeg Vajtswv li los tau, txoj no yoojyim heev, tiamsis yuav tsum rau siab ntso teevtiam dab tiag tiag thaum koj tseem ua neej nyob no thiab.

Yog koj xaiv Vajtswv txoj, tsis yoojyim mus church xwb, kom yuav tsum paub txog Vajtswv tej lus samhwm kom zoo zoo. Nyob tsam Vajtswv muab npog tseg tsis pub koj paub, ces koj rhiav tsis tau qhov tseeb. Koj nrog luag mus pe-hawm Vajtswv, tiamsis thaum kawg koj nrhiav tsis pom Vajtswv txoj kev. Daviv thov Vajtswv kom tsis txhob muab npog tseg tsis pub nws paub. Yam uas koj tsis xav paub, koj yeej yuav tsis paub, yam uas koj tsis nrhiav, koj yeej tsis pom thiab yam uas koj tsis txais yeej tsis yog koj tug.

Nim no coob leej pheej cia siab rau tsev neeg tus coj, tiamsis kuv qhia rau nej hais tias, nej tus coj ntawd yeej pab tau nej qee yam ntawm nqaij tawv xwb, nws pab tsis tau nej tus ntsujplig thiab xa tsis tau nej mus Ceeb-tsheej.

II. Tsis muaj neeg paub txog yus lub sijhawm

(119:27)

Coob tus tau nrog luag mus pe-hawm Vajtswv ntev ntev, tabsis tsis to-taub txog Vajtswv txoj lus thiab Vajtswv lub homphiaj. Tsis paub tias Vajtswv tsim neeg los nyob ua dabtsis. Tom qab tuag lawm yuav mus qhov twg. Feem coob pheej xav li no:

- Kuv twb nrog luag mus church lawm ces yeej tau Vajtswv lub tebchaws lawm

- Ntseeg xwb ces yeej yuav tau mus Ceebtsheej

- Ntseeg yuav tsum coj Vajtswv tej lus samhwm (V. 35)

- Ntseeg yuav tsum ua neeg ncajncees (V. 43)

- Lwm tus ntseeg ces yus yeej tau lawm thiab

- Lwm hnub xibfwb mam qhuab ke xwb

- Tiamsis cov ntseeg tiag yog cov paub qhov tseeb thiab paub txoj kev (Yauhas 14:6)

Example: Phaunkauj 119:39- Daviv hais tseg li no:

- Kuv ntshai tsam muaj neeg thuam kuv

- Thov pab tsis txhob cia luag thuam kuv

Tus neeg ntseeg tiag yog tus paub li no:

1. Paub ntshai tsam tsis ntsib Vajtswv

2. Paub ntshai tsam muaj neeg thuam yus kev ntseeg

3. Paub ntshai tsam tom qab txojsia tu tsis muaj tus pab

4. Paub thov Vajtswv pab thaum tseem ua neej nyob no

Example: Muaj ib zaug thaum peb mus sablaj hauv nroog, muaj coob leej tuaj sib ntsib. Ib tug phoojywg txawm yws yws hais tias, “neeg yeej tsis paub txog yav tom ntej li os!” Tamsis ntawd, ib tug txwjlaug thiaj li teb ntuas hais tias, “tus phoojywg, cas koj hais tau tu siab ua luaj li kod? Kuv qhia koj paub tias, peb tsis tau tag kev cia siab, nimno muaj ntau leej xibfwb paub txog Ntuj Ceeb-tsheej zoo li cas, thiab ntuj tawg zoo li cas lawm. Hais txog teeb-meem ntiaj teb no yeej tsis muaj ib yam twg uas tsis tau tshwmsim dua, nws tsuas yog tej uas twb xub tshwmsim rov muaj dua xwb. Yog peb tuaj ua-ke kawm, ua-ke npaj tawmtsam ces peb yeej yuav zam dhau qee yam thiab.”

Kuv los nyob lub nroog Milwaukee, Wisconsin no tau 24 lub xyoo lawm. Peb cov Hmoob tsiv los nyob coob txog ntawm 15,000 leej vim lub nroog no muaj haujlwm zoo rau txhua tus ua. Tiamsis ua ntej yus yuav tau haujlwm ua txhua tus yuav tsum muaj ib daim ntawv xiav xiav, muaj yus npe thiab muaj ib tus lej sau rau. Teb-chaws Amelikas, peb hu ua “Social Security” Card. Ib yam li ntawd, cov ntseeg yuav tsum muaj “Citizen of Heaven” los yog hu ua “Vajtswv haiv neeg” uas muaj Vajtswv tus Ntsujplig ua lub cim nias rau.

Tus ntseeg Vajstwv tiag zoo li cas?

1. Tsis yog mus church kom mob zoo

2. Tsis yog dhuav kev ua Dab

3. Tsis yog xav kom Vajtswv pab xwb

4. Tsis yog ntshai dab es khiav los xwb

5. Tsis yog ntshaw khoom es los xwb

Cov ntseeg uas muaj Vajtswv tus Ntsujplig nias rau lawd muaj lub siab xav txawv dua li cov tsis ntseeg:

a. Hloov Citizen Dab los rau Vajtswv

b. Hloov lub siab phem los coj lub siab zoo

c. Hloov txoj kev phem los ua txoj kev zoo

d. Hloov ntuj tawg los mus ntuj Ceeb-tsheej

e. Npaj lub neej no hla mus rau lub neej tomntej

CONCLUSION: Phaunkauj 40:4-5

Cov ntseeg rov los xav saib, leejtwg yog cov tau Vajtswv txoj koobhmoov? Koj los ntseeg, koj yuav tau yam twg, yog koj tsis ntseeg koj yuav tau dabtsis?

1. Cov ntseeg thiab cia siab yog cov tau koob hmoov

2. Vim cov ntawd tsis kam pe-dab pe-mlom

3. Tsis muaj tus suav tau Vajtswv txoj koob hmoov thiab tsis muaj tus yuav paub piav kom tas li