YUAV TSUM HWM TXOJ KEV SIB YUAV

(Valentine Day)

Henplus 13:4

(By Rev. Nengmay S. Vang)

Introduction: Xyoo 2006 Pastor and wife retreat nyob Florida, niam Xibfwb wb tau mus ncig xyuas nroog Clear water/Pitsburg, thaum tig rov los rau Orlando, wb los nrhiav Motel pw nyob ntawm Disney World Park. Thaum wb tabtom los txog ntawm chaw nres tsheb, lub Motel ciali hloov tus sign kiag “No Vacancy” lawm. Niam Xibfwb hais tias, lub Motel no tsis txais neeg lawm laiv! Kuv hais tias, koj nyob nov es kuv mus xyuas tso. Thaum kuv nkag mus xyuas, muaj 3 tug neeg tabtom nrog tus tswv tham. Tus tswv tsev (Motel) hais rau lawv tias, “Kuv lub chaw so no twb puv tas lawm”. Thaum cov neeg ntawd tawm mus lawm, kuv mam li nug tus tswv tsev tias, “Would you check my name. I had reservation for tonight!” (Thov koj txheeb npe saib kuv puas muaj chaw pw hmo no vim kuv twb xub Thaum tus tswv tsev qhib txheeb npe, nws hais tias, “Yes, Mr. Vang. We expected you tonight!”(Yog law hlob Vaj, peb yeej tos tias koj yuasv tuaj hmo no!). Ces wb li tau chaw pw sov so hmo ntawd.

No Vacancy! No Vacancy! No Vacancy!

Thaum kuv yuav kuv poj niam lawm, tseem muaj ntau tus hluankauj nyiam kuv thiab, tiamsis kuv rau daim sign No Vancancy tso ntawm qhovrooj ces cov hluas nkauj tsis nkag los hauv kuv tsev. Ua ntej kuv yuav kuv pojniam, nws twb xub muaj ib tug hluas nraug uas nws tham thiab hlub heev li. Tiamsis nws txiav txim siab xaiv kuv lawm. Nws hais tias, kuv yog tus nws hlub tshaj. Ces kuv hais rau nws hais tias, hnub no mus koj yuav tsum coj daim sign “NO VACANCY”, thaum lwm tus hluas pom koj daim sign lawv yuav tsis nkag los hauv koj tsev los yuav thab koj li lawm.

Txhua tus niam tsev/txiv tsev uas coj daim sign “No Vacancy” yeej tsis muaj tus thab, thiab txhua lub tsev uas tus niam tsev rau daim sign “No Vacancy” rau lawm yeej tsis muaj hluas nraug tuaj xyuas. Txhua lub xovtooj thiab E-mail uas muaj “No Vacancy” yeej tsis lam muaj tus hu/sau ntawv tuaj tham.

Tiamsis yog hnub twg neb ib tug muab daim sign hloov rov qab rau “VACANCY” ces txawm koj muaj txiv/pojniam lawm los yeej muaj neeg yuav tuaj tham tuaj xyuas. Rau qhov lawv pom koj daim “SIGN.” Luag tuaj xyuas koj yeej tsis txhaum rau qhov koj daim sign qhia tias koj kam txais tos qhua.

Henplus 13:4, Tsimnyog nej txhua tus yuav tsum saib taus txoj kev sib yuav ua txij ua nkawm. Tus txiv thiab tus niam, ib leeg yuav tsum muab siab npuab ib leeg.Vajtswv yuav rau txim rau cov neeg ua plees ua yi, thiab cov neeg mus nrog luag poj luag txiv pw li yog nws tus.

Lo lus HWM hauv phau ntawv no peb siv lo lus “SAIB TAUS” txoj kev ua txij ua nkawm. Txhais hais tias:

1. tus txiv uas saib taus nws rooj tshoob, yog saib tau cov neej tsa, cov kwvtij ces nws thiaj hwm tus poj niam thiab muab siab npuab tiag tiag
2. tus poj niam uas saib tau nws rooj tshoob yog nws saib taus cov kwvtij, cov neej tsa nws thiaj muab siab npuab nws tus txiv mus txog hnub laus.
3. Tej neeg zej neeg zos los yuav tsum saib tau ob tug neeg sib yuav ntawd rooj tshoob. Lawv tsis lam thab lam zes, tsis hais ze tus niam los yog zes tus txiv.

Kev rau txim rau cov neeg uas saib tsis taus txoj kev sib yuav: (1) tus txiv los yog tus niam uas xub saib tsis taus txoj kev sib yuav; (2) lwm tus uas lam tuaj deev luag poj luag txiv.

Tshoobkos: (Chivkeeb 2:21-25) Vajtswv yog tus rhawvtsim txojcai rau txivneej yuav poj niam thiab pojniam yuav txiv nyob hauv lub vaj Edees yog thawj zaug

Gen. 1:28, Vajtswv foom koob-hmoov rau neeg hais tias, “Neb ciali muaj tub muaj ki coob coob, neb tej xeebleej xeebntxwv thiaj li yuav huajvam mus nyob thoob plaws qhovtxhia chaw puv ntiaj teb, thiav kav ntiaj teb tagnrho.”

KEV UA NIAM TXIV (SEX):

Thaum Vajtswv muab tus txivneej thiab tus pojniam sib txis ua niam txiv tas, Vajtswv foom koob-hmoov rau nkawd:

1. Neb ob leeg yuav pw ua-ke (sib ua) kom muaj menyuam coob coob mus puv qabntuj (v.28). Yog siv yuav lawm tsis sib ua ces tsis haum Vajtswv siab thiab.
2. Neb tej xeebntxwv yuav ua cov kav ntiajteb no tibsi (V.28).
3. Neb yuav muaj noob qoob noob txhua yam (V.29) noj tsis tas

Example: Kuv hnov ib tug Xibfwb Amelikas qhia txog kev ua txij nkawm. Nws hais tias, ib tug pojnam thiab ib tug txivneej uas nkawd sib yuav lawm, muaj neeg nrog paub tias nkawd yog niam txiv lawm, sib ua tsis txhaum Vajtswv cai thiab tsis txhaum neeg cai, qhov nkawd sib ua (make love) li no yog nkawd ua li kom nkawd ua es thiaj li muaj menyuam coob coob raws li Vajtswv foom tseg. Nws hais tias, ob niam txiv sib ua mas zoo nkauj heev.

Thaum kuv tseem yau, kuv yug ib cov qaib dib. Kuv nrhiav yuav kom tau tus lau uas qua zoo zoo, ces kuv mus nrhiav kom tau tus poj zoo zoo nkauj los tso ua qe. Thaum kuv tso tus poj thiab tus lau ua-ke lawm, kuv mus zaum ntev saib ntsoov saib tus lau puas tsuam tus poj. Thaum twg tus lau tsuam kiag tus poj lawm mas kuv zoo siab kawg li. Rau qhov kuv lub homphiaj yog tso nkawd tsuam qe ntag. Ntau zaus thaum kuv tso tus poj mus rau tus lau, nws tsis tsuam tus poj li. Thaum ntawd kuv chim siab vim yuav tsis tau menyuam raws li kuv siab xav tseg.

Nej cov pojniam uas yuav txiv tas es tsis muaj menyuam, dablaug nug tias yawmyij tsis hlub los cas es koj tsis muaj tub li? Ob tug neeg sib yuav lawm, ua menyuam tsis txhaum neeg cai thiab tsis txhaum Vajtswv cai.

Thaum koj txiav txiav muag rau koj pojniam es neb nkag mus hauv txaj lawm, tsis lam muaj neeg kam nkag mus xauj neb ua toob ua xib. Txawm Vajtswv pom neb ua los nws yeej zoo zoo siab xwb vim Vajtswv yog tus hais tias, neb yuav tsum ua li no kom muaj tub muaj ki coob coob. Qhov no yog tej niam txiv txhua tus tes haujlwm ua raws li Vajtswv foom tseg.

Peb Hmoob mas txaj txaj muag tham txog ob niam txiv sib ua ces peb muab lo lus tshiab los hloov hais tias pw ua-ke/ua niam txiv. Tiamsis los lus “deev” yog ib lo lus hais tias sib ua tsis raws cai. Vajtswv lo lus hais tias, cov mus deev luag poj luag txiv yuav raug txim. Valentiane day: Yog hnub tus txiv/niam nyias hais rau nyias tus hlub tias xyoo no mas kuv tsuas ua koj ib leeg xwb. Tsis lam mus deev lwm tus hlo li.

Niaj hnub nim no (Present Day), neeg coj lub neej tsis ncaj kiag li (man and woman became unholy at God’s sight): Vajtswv phau ntawv hais lo lus “ua plees ua yi” vim suav hnub suav hmo, cov txiv pheej nyiam mus deev lwm tus pojniam coob zuj zus, thiab cov pojniam los txawm sib yaum mus deev lwm tus txivneej coob zuj zus tuaj. Vim li no, yuav luag txhua pawg ntseeg thiaj li npaj ua Valentiane day kom nyias rov cog lus rau nyias tus hlub hais tias xyoo no kuv tsuas ua koj ib leeg xwb os. Tiamsis leej twg yuav paub tias tus hlub hais li ntawd puas yuav ua tau li nws hais. Thaum nws mus dhau ntawm yus qhovmuag lawm ces tsis muaj tus paub li lawm. Yog li hnub no kuv yuav muab 3 yam rau cov txiv tsev thiab muab 3 yam rau txhua tus niam tsev coj mus ua neej rau xyoo 2007-2008:

Loo 2:7 Vajtswv yuav muab txojsia ntev mus ib txhistsis txawj tuag rau cov neeg uas niaj hnub ua zoo, nrhiav koob-meej thiab xav kom Vajtswv qhuas

1. NIAJ HNUB NRHIAV UA QHOV ZOO PAB YUS TUS HLUB XWB

Koj yeej paub hais tias ua yam twg thiaj yog qhov zoo, thiab ua yam twg yuav txhaum, tiamsis ntau leej ua zoo los ntev ntev lawm ces txawm xav ua qhov phem:

a. Xav qhov zoo xwb: Muaj ob niam txiv nyob Milwaukee sib sib hlub kawg li thiab ib leeg yeej ua zoo rau ib leeg los tau lub xyoo. Xyoo tag los, tus txiv mus ua haujlwm, txawm mus ntsib dua ib pab phoojwg tshiab uas luag hais tias cov hlwb tawg. Lawv muaj cov hluas nkauj 14-15 xyoo nyob Nplog teb tej xovtooj thiab muab rau tus txiv. Nws txawm mus yuav Phone Card tham ces cov hluas nkauj ntxias nws zoo heev. Nws hloov siab thiab txawm pom hais tias tus pojniam laus lawm, nws xav tau tus 14-16 xyoo yuav sov siab dua. Ob niam txiv no txawm muaj teeb-meem thiab tsis yog ob tug qub 10 xyoo dhau los lawm. Xav tsis zoo, xav phem, xav yuam-kev, xav pom tximtaws, xav ntaus neeg, xav siv nyiaj rau hluas nkauj…ete…

b. Ua qhov zoo xwb: Thaum koj lub siab xav phem rau koj tus txiv/pojniam lawm, koj yeej ua tsis tau qhov zoo uas haum nws siab rau qhov tej haujlwm uas koj ua, koj tsuas lam ua xwb, koj tsis ua kom zoo. Koj lam mus ua mov/zaub, koj tsis ua zoo ua tsis qab, yog nws tsis yws ces zoo, yog nws yws cws muaj teeb-meem ntag.

c. Hais lus zoo xwb: Tus uas xav qhov phem thiab pib ua haujlwm phem lawm, nws yuav pib hais cov lus phem tawm tuaj. Lub siab thiab lo lus yeej ua ib txoj haujlwm nkaus xwb.

Example: Muaj ib tug pojniam tuaj piav txog nws tus phoojywg lub neej deev hluas nraug. Nws tus phoojywg hlob tuaj ces tsuas tau tham nws tus txiv ces sib yuavxwb. Tiamsis tus txiv nyiam hu nkauj thiab taug zos heev. Thaum tus niam mus ua haujlwm txawm mus hnov lwm tus pojniam tham txog tias tham hluas nraug mas zoo siab heev li. Thaum nws rov los tsev ces txawm pib hais lus phem lawm. Hais lus phem xwb tsis txaus, nws txawm nrhiav taug kev phem lawm ces txawm mus deev ib tug yawg uas twb tsis zoo nraug li nws tus txiv. Nws hais tias, kuv tus txiv hluas zoo nraug thiab hlub kuv, tiamsis nws tsis muab kev zoo siab rau kuv txaus li tus yawg laus ntawd.

Nej cov txiv nej yuav tsum muab kev hlub thiab kev zoo siab kom txaus rau cov pojniam, nej tsis txhob ua menyuam xwb, nej yuav tsum ua kom nws zoo siab.

II. NRHIAV LUB KOOBMEEJ ZOO XWB

Thaum neb ob leeg sib yuav thiab los pib ua neb lub neej, neb yeej hais rau hauv lub siab hais tias yuav ua lub neej zoo kom tsis muaj koob los kom muaj npe zoo. Vajtswv phau ntawv hais tias, tus uas xav nrhiav koob-meej yog tus xav ua qhov zoo kawg nkaus, Vajtswv thiaj hais tias tus ntawd yuav tau txojsia uas tsis txawj tuag.

Example: Ib hnub kuv mus ntsib 5 tug txiv neej Hmoob uas tuaj Thaib teb tuaj tsis ntev tham pem. Thaum lawv pom kuv mus txog, ib tug txawm nug tias, “hlob, koj yog Hmoob Vaj ntshe koj muaj koob heev pauj?” Kuv teb nws tias, nej tham txog dabtsises lam nug kuv? Nej hais txog cov muaj koob zoo los cov muaj koob phem? Lawv mam li teb tias, muaj ntau leej los xyuas peb tim qhov pobtsuas, lawv muaj meejmom kawg li, tiamsis thaum peb tuaj txog no ua cas lawv ho yog cov tsis tseem-ceeb hlo li.

Thaum kuv yuav pojniam kuv muaj 18 xyoo, pojniam muaj 15 xyoo. Thaum ntawd los rau hnub no muaj 40 xyoo lawm. Hnub kuv yuav kuv pojniam los, kuv thawj lo lus hais rau nws yog: (1) koj yog tus los nrog kuv tsim kom wb muaj koob-meej zoo rau lwm tus xyaum; (2) wb tso tej kev plees yav tag los tseg tibsi, kuv hlub koj tiag thiab koj hlub kuv tiag kom neeg zej zos ntshaw thiab muab wb ua tus qauv ua neej; (3) muab koj lub siab npuab kuv tsis xav phem thiab tsis ua yam phem ib zaug li. Wb yuav yog thawj nkawm niam txiv hauv peb tsev neeg uas ua yamntxwv zoo rau cov kwvtij xyaum (Lawv muaj pojniam coob heev). Koj yuav tsum ntseeg kuv.

Tsim kom muaj koob-meej: (A) Muaj koob phem (Negative) thiab (B) muaj koob-meej zoo (Positive).

Peb cov pojniam yav thaum ub 75%-90% nrhiav lub koob-meej heev. Thaum cov ntxahis pom ib tug tub hluas tuaj tham lawv, lawv xub nug saib nws yog pab pawg neeg twg, nws kwv nws tij yog leej twg. Nws niam nws txiv yog leej twg. Tom qab ntawd cov ntxhais yuav tham qhia rau nws niam thiab nug saib puas yog neeg zoo los neeg phem. Yog neeg muaj los neeg plaug, yog neej hom ua liaj ua teb los yog ua nom ua tswv. Thaum lawv paub tus tub hluas zoo lawm ces lawv pab tus ntxhais 2 yam: (1) txwv tsis pub tham thiab (2) tso cai rau nws tham. Hmoob txoj cai no tseem niaj hnub nyob nrog cov Hmoob laus los txog hnub no. Tiamsis tiam tamsis no lawv tsis tshua coj txoj cai no lawm, cov neeg zoo yav thaum ub yog cov phem, muaj niam hlob niam yau, tiamsis cov pluag thaum ub uas luag hais tias phem ho yog cov zoo nim no lawm.

Peb cov txiv neej feem coob 70%-80% yog cov neeg luabsab heev, muaj pojniam los tseem ua hluas nraug li qub (man never wearing his NO Vacancy Sign). Cov neeg luabsab mas 50% muaj niam hlob niam yaus, tiamsis tseem qhuas tias muaj koob kawg li. Cov tsis kam luabsab mas tsuas muaj 30%-40% ua neej kaj siab lug thiab muaj ib tug pojniam xwb. Nyob USA hnub no txawv lawm, Cov pojniam ntau leej pauj lawv kua zaubntsuab, muab hom txiv neej phem no ntiab tawm mus tsis muaj chaw nyob. Sij hawm li no ces ob leeg puas koob puas meej tag nrho. Niag txiv tawm mus ua dev thawj thiab lawm, niag niam tig tus Sign “VACANCY” rau cov txiv nraugfav tom zos pom ces lawv txawm npaj tuaj tham tuaj deev nroo ntws.

Yog li yuav ua li cas thiaj ceev tau kom neb lub koob meej zoo nrog neb nyob?

Cia kuv muab 3 yam uas tshwmsim rau tej niam txiv qhia rau nej tias kev hlub thiab kev ntxub tawm qhov twg los?

1. Koj yog tus rau hauvncoo xa saib yuav ua qhov zoo los ua qhov phem
2. Qhov kev xav zoo/phem ntawd coj kom koj npaj mus raws li koj xav ntag
3. Qhov koj ua lawd ntag tsim kom muaj yam zoo/phem tawm tuaj

III. UA NEEJ RAU VAJTSWV QHUAS

Peb ib tug nyab khiab ua nkaujfa rau hauv niam tais yawm txiv tsev, tus tub coj ob tug txwjlaug mus nrog nws hais kom pojniam rov qab. Tus pojniam hais rau nws hais tias, “yog kuv rov qab no koj puas yuav hlub kuv tiag tiag?” Tus tub txawm teb hais tias, “Yog koj ua ib tug niam tsev ntxim hlub ces yeej hlub xwb, tiamsis yeej tsis pom koj ua ib yam twg ntxim hlub li yuav ua li cas ciali hlub koj?”

Peb cov ntseeg Vajtswv yeej xav xav kom Vajtswv qhuas kawg li, tiamsis leej twg yog tus txawj ua rau Vajtswv qhuas? Koj sim xav saib ua neej li cas Vajtswv thiaj li qhuas, koj sau rau nram no:

1.

2.

3.

Loo 2:7,10: .. tus uas muaj txojsia ntev tsis txawj tuag yog tus uas ua rau Vajtswv qhuas….Yog leej twg ua tau rau Vajtswv qhuas lawm, (v.10) Vajtswv yuav muaj 3 yam ntxiv rau: (1) muaj koob-meej; (2) muaj ntsej muaj muag and (3) tau zoo nyob kajsiab lug.

Tus pojniam uas mob siab ua nws txoj haujlwm zoo thiab ua tus niam tsev zoo twb yog xav kom tus txiv qhuas, xav kom kwvtij zejzog qhuas. Nws ua zoo npaum li cas los tsis muaj neeg qhuas li ces qee tus txawm tsis ua zoo ntxiv lawm.

Lus nug 1 (Question):

1. Koj ua li cas koj tus txiv thiaj li qhuas koj?
2. Vim li cas nws qhuas/tsis qhuas koj?
3. Koj ua li cas koj pojniam thiaj li qhuas koj?

Yam uas kuv pom yog (My suggestion):

1. Tus txiv/pojniam qhuas: (a) koj ntxim hlub; (b) txawj hais lus zoo; (c) zoo nkauj zoo nraug tuaj hauv lub siab thiab (d) twb cais koj tawm ntawm tej kev phem, kev plees kev yi tas lawm.

Lu snug 2 (question):

1. Tus uas Vajtswv qhuas ua neej zoo li cas?
2. thaum twg Vajtswv li qhuas?

Vajlukub hais tseg (Bible Verses):

Mathais 5:13-14, Yexus muab cov thwjtim piv rau cov ntsev uas las neeg ntiaj teb. Tiamsis Yexus tsis hais txog cov ntsev ua tseem qab ntsev, Yexus hais txog cov ntsev uas twb tsuag tas lawm es luag muab pov tseg xwb. Thiab Yexus hais txog lub teeb uas muaj neeg ze taws rau lawm, tiamsis ho muab khwb tseg tsis ci rau neeg pom kev hmo ntuj.

Ob lo lus no txhais hais tias ntsev tsis qab li ntsev, lub teeb tsis ci rau neeg pomkev ces tsis muaj nuj nqes dab tsis li.

Vajlukub txhais li no rau cov niam txiv:

1. Tus txiv tsev uas tsis ua zoo rau nws tsev neeg zoo li cov ntsev tsuag tas lawm, thiab tus niam tsev uas mus deev hluas nraug zoo li cov ntsev uas tsuag lawm. Neb txawm muaj los pluag, yog neb ob leeg ua neeg dawbhuv thiab mob siab ntseeg Vajtswv ces Vajtswv yeej qhuas neb.
2. Yog neb ib tug mus ntseeg dab ntseeg mlom, mus saib yaig ua neeb thiab pe mlom ces neb zoo li lub teeb uas twb zes rau, tiamsis rov tsis cig lawm. Vajtswv tsis qhuas neb hlo li. Vajtswv chim rau neb kawg li.

Hais txog kev ua niam txiv:

1. Tus niam tsev/txiv tsev uas niaj hmo mus laij hluas nkauj hluas nraug, ces leej twg saib los zoo li tus uas tsis muaj cuab muaj yig. Txhais hais tias nws zoo li tus lojleeb.
2. Yog neb ib tug twg mus ua plees ua yi ces tsim kev sib khib lub siab tawm tuaj, ces neb saib txoj kev txij nkawm tsis muaj nuj nqis lawm. Neb twb tsis hwm txoj kev sib yuav ua txij nkawm ntawd lawm.

Xaus (Loo 2:6) … txhua tus nyias yuav tau sau raws li nyias tau ua los lawm.

Cov niam txiv ntseeg uas Vajtswv qhuas: (1) tu koj lub cev rau koj tus txiv/pojniam nkaus xwb; (2) ua menyuam kom huajvam coob coob li Vajtswv hais tseg and (3) npaj koj mus ntsib Vajtswv thiab txais txojsia tsis txawj tuag ntawm Vajtswv. Koj yuav sau tej uas koj tau ua los lawm

Thaum neb tseem ua neej nyob no, yog neb tus twg ua rau Vajtswv qhuas: Vajtswv yuav muab tus yumsij qhib rooj ntug rau tus ntawd tuav…. Yam nws tso cai thiab yam nws txwv, Vajtswv yuav tsocai thiab txwv li nws hais (Mathais 16:19)

Vajtswv qhuas cov ntseeg uas ua neej dawbhuv (Holy life) thiab hwm Vajtswv xwb.

YOG LI HNUB NO MUS, TUS TXIV TSEV ZOO, TUS NIAM TSEV ZOO, UAS NRHIAV QHOV ZOO, NRHIAV KOOB-MEEJ ZOO THIAB XAV KOM VAJTSWV QHUAS, YUAV TSUM TIG KOJ DAIM SIGN:

NO VACANCY NO VACANCY NO VACANCY

1. At your door (ntawm qhovrooj)
2. On your face (ntawm koj lub tnsejmuag luag)
3. In your heart (hauv koj lub siab xav)
4. At your lip (hais ntawm koj daim dincauj)
5. In your mind (hauv koj kev xav)

February 12, 2007