|
September 26, 2004 Zoo siab,
Xh. Tooj Zoo kuv zoo siab thiab ua Vajtswv tsaug ua
koj tseem muaj lub siab dawb paug teb kuv cov lus
nug rau kuv.
Kuv nyob, NC hauv lub zos Richfield ua nyob ze ntawm
lub zos Albemarle. nyob rau cheeb tsam ntawm no
tsuas muaj ib pawg ntseeg me me xwb, pawg ntseeg
ntawv lawv yog cov ua nyiam ua txhua yam xws li mus
koom nrog cov tsis ntseeg ua txhua yam los tau thiab.
Vim yog li ntawv kuv thiaj li yog ib tug ntseeg ua
nyob tsis muaj pawg tsis tag li ntawv xwb kuv yog ib
tug neeg ua tsis tshua nyiam hais lus, kuv thiaj
tsis muaj ib tug phoojywg hlo li thiab, tiam sis kuv
ntseeg hais tias yog sib tham thiab sib txhawb zog
los ntawm kev sau ntawv zoo li nyob rau hauv E-mail
no kuv yuav hais tau lus ntau dua thiab kuv yuav
paub hais dua.
Nyob rau peb lub xyoo dhau los lawm kuv ntshaw kom
muaj ib tug zoo phoojywg los nrog kuv tham txog
Vajtswv zaj thiab sib txhawb zog tiam sis los txog
rau lub sijhawm tam sim no koj yog thawj tug ua teb
tau rau kuv tias kom kuv qhib siab hlo thiab nug tau
yam ua kuv xav nug kuv zoo siab kawg thaum kuv hnov
li ntawv.
Tiam sis kuv yog ib tug uas xav paub qhov tseeb, yog
li ntawv muaj qee zaus kuv yuav nug tau tej los lus
uas ua rau qee tus neeg lawv xav hais tias yog kuv
xav sim lawv xwb tiam sis kuv xav kom thaum lub sij
hawm uas koj teb kuv cov lus nug no ces koj tsis
txhob xav li lawv cov ntawv xav tiam sis koj yuav
tsum xav hais tias koj thiab kuv wb tsis yog zoo li
pejxeem thiab Xibhwb tiam sis wb tsuas yog sib nug
li qhov ua wb yog phoojywg sib pab nrhiav tswv yim
xwb
yog los ntawm tus tswv Yexus lub npe peb yog ib
tseneeg xwb tsim nyog peb yuav tsum tau sib pab ua
tsaug.
Kuv xav nug ib nqe xws li nram no.
1. yog muab ua tib zoo saib los lawm lo lus ua tswv
Yexus hais tseg nyob rau hauv Mathais 28:19 nws hais
tias Thaum nej muab lawv ua kevcai raus dej nej yuav
tsum tuav Leejtxiv leejtub thiab tus Ntsujplig lub
npe.
Lo lus no niaj hnub nim no peb sawv daws puav leej
tseem siv thaum peb muab neeg ua kevcai raus dej
tiam sis thaum peb hais peb hais tias los ntawm
Vajleejtxiv Vajleejtub thiab Vajntsujplig lub npe.
yog peb hais li ntawm noxwb. no ces zoo li peb
tsuas yog qog nws qab xwb vim peb tsis tau hais
Leejtxiv nws lub npe, Piv txwv li nram no, xws li
Vajtswv lub npe mas hisnplus hais tias Yaves"
Leejtub Tswv Yexus los puas sis Yasuaj lus hisnplus
thiab Vajntsujplig tus Dawbhuv. ua kuv los kuj tseem
tsis tau Paub txog nws lub npe thiab ? yog koj paub
thov qhia pub rau kuv.
Ua li koj puas xav hais tias zaj ua hais los saum no
yeej tshua qee yam tiag ?
Los yog kuv tus ua kwv xav ntau dhau lawm xwb ?
Xav thov kev pom zoo los ntawm koj thiab vam tias
koj tus ua tij yuav pab kom kuv nkag siab thiab tau
taub ntxiv ua tsaug.
Soob Ntxhoos Xyooj
Chongxiong@ctc.net> |
|
September 27, 2004
Kwv Soob Ntxhoos Xyooj,
Kuv tau nyeem koj cov lus nug lawm. Cia kuv teb koj raws li kuv tau kawm
mentsis thiab Vajtswv tus Ntsujplig coj. Kuv ntseeg tias yog koj yog ib
tug uas muaj Vajtswv nyob hauv siab tiag, koj yuav tsis yog lam sim kuv
xwb. Tiamsis yog xav paub tiag es koj thiaj li nug los ntawm lub siab
dawbpaug.
Thaum kuv tau nyeem koj tej lus kuv thov Vajtswv pab koj heev vim kuv
twb muaj tej tug phoojywg uas thaum ub yog ib tug ntseeg zoo. Tiamsis
tamsim no lawv tso txoj kev ntseeg tseg thiab mus ntseeg ib yam txawv
txawv uas hu hais tias “Yaves, Yasuaj” lawm. Lawv cia li mus nyob hauv
tsev tsis tshwm qhov twg li lawm. Lawv mus txog qhov twg los lwm tus cia
li fee lawv lawm xwb. Tseem muaj kuv ib tug phooj ywg hu rau kuv tias
nws xav dai tuag lawm xwb vim nws pom tias nws yuam kev loj kawg li lawm.
Kuv hais li no tsis yog kuv hais tias ntshe koj twb yog lawv cov ntawd
ib tug lawm. Tiamsis yog kuv hais tias xav kom ua twb zoo xwb.
Vajtswv phau ntawv yeej yog txhais tawm los ntawm lus Kilis & Henplus
los xwb. Nyob hauv haiv neeg Kilis (Greek) thiab Henplais (Hebrew) tej
lus, yog ib co ua tsis yoojyim to taug. Tej zaum nyaj koj yuav tau kawm
lawm thiab. Yog tsis kawm kom muaj peev xwm nkag siab tiag mas muaj coob
leej siv yuam kev los muaj. Kuv yog ib tug uas txhais peb phau Bible
Hmoob nimno sawvdaws siv thiab.
1. Los lus Hebrew “YAVEH” uas hais nyob ntawm ( Khiavdim 3:14) los lus
ntawd tsis yog NPE (proper name). Lo ntawd txhais hais tias “KUV YOG KUV”.
Muaj ib txhia lawv tsis ua twb zoo taug qab thiab xyuas meej. Lawv txawm
ntseeg hais tias ntawm yog Vajtswv lub npe. Vajtswv yeej tsis muaj npe
li peb tib neeg, vim Nws tsis yog neeg. Kuv xav kom koj mus tshawb ntxiv
es txhob mloog tus ub tus no koj yuav pom qhov kuv hais no.
2. Lo lus “YESOUS” yeej yog Yexus lub npe uas nyob rau ntawm Mathais
1:21 es ib tug tubtxib hais rau Yauxej hauv nruab npau suav uas Amelikas
hu ua “Jesus”. Muaj ib txhia yuav nug hais tias yog vim ua li cas Yexus
twb muaj npe es Vajtswv ho tsis muaj. Qhov tseeb yog vim Yexus yuav los
yug ua neeg rau neeg hu. Tiamsis Vajtswv tus uas yog Txiv , Nws yeej yog
Nws xwb tsis muaj leejtwg tseem loj dua nws es yuav tis Npe tau rau Nws
li.
Txawm yog yuav hais tias “ Yasuaj, Yexus & Jesus”los yeej tsis ua cas
vim neeg lub npe ib haiv neeg nyias yeej sau nyias txawv lawm ib yam. Ib
yam li koj lub npe lus Hmoob koj sau ua “Ntxhoos Xyooj”. Tiamsis
Amelikas koj ho sau ua “Chong Xiong” 2 los no yeej sau txawv. Tiamsis
puav leej tseem yog koj lubnpe tib yam. Txawm yog cov Amelikas yuav hu
koj txawv mentsis los koj tseem paub tias lawv hu koj lubnpe thiab koj
paub teb lawv. Yog li Yexus nws tseem ntse dua li peb tib neeg lawm yog
vim ua li cas peb thiaj li hais tias nws yuav tsis paub.
3. Nyob ntawm Mathais 28:19 (1) lo lus “pater” txhais hais tias “tus uas
yog txiv” lus Amelikas hais tias “Father” nws yeej yog hais Vajtswv.
Tiamsis lawv tsis siv los lus “Yaveh” rau ntawd es ua cas yus thiaj li
yuav txua tias “Yaveh” no ua dabtsi? (2) lub lus “huios” txhais hais
tias “tus uas yog tub” nws yeej yog hais txog Yexus ntag, tiamsis yus
yuav cia li txua “Yasuaj” rau yeej tsis yog lawm thiab.
Me kwv, kuv yeej yuam tsis tau kom koj ntseeg kuv. Tiamsis kuv xav tias
qhov zoo tshaj rau koj tshaj mas kuv xav kom koj txhob lam tau lam
ntseeg tus ub tus no thiab tsis ntseeg tus ub tus no xwb. Tiamsis koj
yuav tau siv sijhawm li ntawm 4-5 xyoos mus kawm kiag hauv tej tsev kawm
Vajtswv txojlus qib siab thiab kawm lus Greek & Hebrew kom txaus nkaus
kom koj txhob thawj leejtwg li lawm. Thaum ntawd, koj thiaj li yuav paub
tias leej twg hais yog thiab tsis yog. Kuv hais li ntawd vim nimno lub
ntiajteb no muaj cov cuav thiab cov tseeb nyob uake sib xyaws ntxaws.
Nco ntsoov txhob pub zoo li tus ntoo uas nyob saum roob es cia cua
ntsawj mus mus loslos xwb. Thaum tseem khov ces cua ntsawj tag los nyaj
tsuas ib nyuag rawv xwb. Tiamsis thaum raug ntsawj ntau es tsis khov
lawm ces yuav cia li vau. Tus ntseeg tiag yog tus npaj nroos yam tsis
ntshai thiab tsis txajmuag es yuav muab nws lub tswvyim zoo uas Vajtswv
pub rau nws mus tshaj txojmoo zoo kom thoob ntiajteb (Mth.28:19-20).
Tiamsis yog nyob hauvtsev xwb yuav ua li cas hais tau tias muaj kev
ntseeg? Rau qhov tswv Yexus nws tsis nyob hauv tsev xwb, nws nqis saum
ntuj los yug ua neeg thiab nws mus rau ub rau no nimno peb thiaj li hnov
txojmoo zoo no.
Kuv yuav nco ntsoov thov peb tus Vajtswv roos koj kom koj nrhiav tau
qhov tseeb es qhov tseeb ntawd yuav qhib koj txoj hau kev.
Zoo siab ntsib koj thiab ntseeg tias tseem yuav ntsib koj ntxiv thiab.
Yog tej kuv teb koj no pab tsis tau koj los txhob xav li cas.
Xh. Tooj Zoo E-mail:
question-answer@hbna.org |
|
September 28, 2004
Tijlaug Tooj Zoo,
Kuv zoo siab heev tias koj muaj lub siab dawb paug
qhia txhua yam thiab tsis zais ib qho li.
1. kuv ua koj tsaug ua koj tseem muaj lub siab hlub
thiab txhawj txog kuv thov Vajtswv foom koobhmoov
rau koj thiab coj koj pawg ntseeg txoj hau kev kom
tsuas muaj Vammeej xwb.
2. Zoo siab uas koj tseem qhia kuv kom paub meej
txog ntawm lub npe Yasuaj thiab Yasvem.
3. txam yog tias kuv tsis muqaj tswvyim txawj ntse
yuav tau mus nrog luag kawm kom tiav los kuv cia
siab hais tias kuv yuav tau kawm los ntawm koj tus
ua tij.
4. Qhia rau koj tus ua tij paub hais tias kuv tsis
yog cov ntseeg Yasuaj thiab Yasvem, kuv yog cov ua
ntseeg hais tias tus Tswv ua yog Vajtswv thiab leej
tub ua yog tswv Yexus thiab Vaj Vajntsujplig.
5. Ua ntej ob peb lub xyoo dhau los lawm no kuv yog
ib tug ntseeg ua nyob rau hauv Kabntsab, tiam sis
txij li thaum uas tus thawj coj tau ua txhaum, thiaj
ua rau peb tawg ua sab ua sua lawm los txog rau niaj
hnub no los kuv thiaj li tseem tsis tau muaj pab
muaj pawg.kuv ntshaw kev sib txhawb zog thiab kev
sib pab sib qhia los ntawm tej tus Phoojywg uas muaj
lub siab loj siab dav li koj vam tias koj yuav tsis
tso kuv tseg thiab.
6. Zaum no kuv xav nug txog ntawm lo lus ua hais
tias Txoj kev Hlub nplog tau kev txhaum, los lus no
yuav muab piv txwv lica es peb thiaj tau taub?
7. Nyob rau hauv phau Yauj, yauj muaj peb tus
phoojywg tuaj xyuas yauj, raws li kuv nyeem lawm ma
zoo li lawv tuaj ntuas Yauj kom yauj cia li lees
tias yauj yeej muaj kev txhaum tiag es yauj thiaj li
raug tej xwm txheej ntawv tiam sis yauj tsis kam
lees txog qhov kawg yauj thiaj dim lawm puas yog
thiab thov koj qhia rau kuv ntxiv kom tau taub zoo
dua no nawb ua tsaug.
soob Ntxhooos xyooj
Chongxiong@ctc.net> |
|
September 28, 2004
Kwv Soob Ntxhoos Xyooj,
1. Kuv paub xibhwb Txawj Vag, tus thawj coj cov kab ntsab
zoo. Nws yog ib tug uas muaj tswvyim zoo hais txog kev qhia rub neeg
siab kom lawv nws qab. Tiamsis yog leejtwg paub Vajtswv txojlus zoo no
yuav tsis lawv nws qab vim Vajtswv txojlus yeej qhia meej lawm tias
tsuas muaj tib tug cawmseej uas yog tswv Yexus xwb. Tiamsis nws ho qhia
tias nws yog ib tug cawmseej ntxiv uas Vajtswv tso los cawm ib tsoom
Hmoob thiab. Raws li Vajtswv txojlus qhia mas yog leejtwg tsav hwjchim
thiab nws qhuas tias nws nrog Vajtswv nyob ib theem lawm ces tus ntawd
yeej tawmtsam Vajtswv txojlus thiab nws tsis coj raws li Vajtswv tsojlus
lawm. Nws yog tus tabtom yuav yuamkev vim nws kom Vajtswv ua raws li nws
hais tsis yog nws ua raws li Vajtswv hais.
Qhov zoo tshaj thiab yuav kom txhob yuamkev ntxiv lawm
ces peb tsis txhob ntseeg neeg vim txhua tus neeg puav leej muaj kev
txhaum huvsi ( Loo 3:12). Yog yus ntseeg neeg, thaum neeg yuam kev ces
yus yuav nrog lawv yuamkev huvsi. Tiamsis yog yus ntseeg Vajtswv xwb,
thaum lwm tus yuam kev lawm yus tseem yuav nyob yus khov kho li qub.
2. Koj nug ib los txog ntawm hais tias " KEV HLUB NPOG
TAU KEV TXHAUM". Tej zaum yog koj hais txog zaj uas sau nyob ntawm
Pajlug 10:12; 1 Petus 4:8; 1 Khaulithaus 13:13. Los no yog ib los
tseemceeb heev kawg li hauv Vajtswv phau ntawv. Muaj ntau zaus peb neeg
siv nyuab heev thiab peb tsis paub los lus "HLUB"yog li cas tiag. (
kwv koj mus hauv peb lub website
www.hbna.org es koj mus click MEADIA uas nyob sablaug koj mus mloog
kuv qhia yam puav huav txog KEV HLUB ntawm txijnkawm seb puas muaj yam
pab tau koj).
Nyob hauv Vajtswv txoj lus muaj 2 los lus hais txog
HLUB. Ib los lub Greek hu ua "agapao" hos ib los hu ua "eithima".
a. Lo "agapao" txhais
tias "HLUB" yog lo hais txog HLUB li Vajtswv hlub tib neeg. Hlub tus
neeg uas nws yeej hlub tsis tau yus los yus tseem hlub nws li nws yog
nws. Vim Vajtswv HLUB (agapao) neeg ntiajteb kawg li nws thiaj li txib
nws tib leeg tub los rau hauv lub ntiaj teb (Yh.3:16). Yog yus hlub nws
lawm, txawm yog nws ua txhaum rau yus los yus yeej zamtxim tau rau nws.
Lo lus "zamtxim" lus Greek yog "aphiemis" txhais hais tias "yus
tsis suav hais tias nws muaj txim nyobhauv yus lawm" los yog " hais tias
" yus twb muab lub txim uas nws muajntawd pov tsev tawm hauv lub siab,
hlub hlwb thiab lub neej lawm". Pivtxwv ib yam li tias (1) muaj ib tug
yogkoj tus tub hos muaj ib tug yog lwm tus tus tub (2) nkawd ob leeg
puav leej mus ua phem rau lwm tus sab nraud es luag caum los nkag rau
hauv koj tsev. Tej zaum koj yuav nrog npog koj tus tub uas koj hlub tej
kev txhaum thiab hais tias tsis muaj neeg khiav los hauv no as. Koj yuav
pab nws tswvyim kom nws tsis txhob raug txim. Tiamsis tus uas tsis yog
koj tus tub uas koj hlub, thaum luag caum tuaj koj yeej yuav qhia tias
nws nyob nov kom luag coj nws mus.
Peb yeej yog neeg txhaum thiab yog Vajtswv cov yeeb
ncuab, tiamsis vim txoj kev hlub, Vajtswv txib tswv Yexus los tuag theej
peb lub txhoj (Loo 5:10) kom peb tau nrog Vajtswv sib raug zoo dua.
b. Los lus "eithima" txhais hais tias "SIBLHUB" los no
hais txob kev sib hlub li tib neeg sib hlub. Koj yuav tau hlub kuv mas
kuv thiaj li muaj lub zog hlub koj. Yog koj tsis hlub kuv ces kuv los
yuav ua tib yamnkaus. Nimno peb neeg lub neej siv los "eithimas" ntau
dua li "agapao" vim peb hlub nws vim peb xav kom nws ua li peb hais xwb
thiab kom nws rov hlub peb xwb.
Peb neeg ntiajteb feemcoob siv tsis tau los lus "agapao"
yuav yog tus muaj kev ntseeg tiag thiaj li siv tau. Tiamsis Vajtswv
txojlus hais tias peb yog cov ntseeg thiab lub teeb (Math.5:13-16). Yog
li yeej tsim nyog peb siv kom tau los lus "agapao" peb thiaj li yuav yog
Vajtswv cov menyuam uas zoo kawg nkaus. Txawm luag tsimtxom yus los yus
tseem hlub luag yus thiaj li yuav yog tus tau nqi zog cia nyob
ceebtsheej (Mth.5:11-12).
Kwv hnub no cia kuv teb koj li no es lwm hnub wb mam
tham txog Yauj zaj dua...
Nyog zoo koj thiab tsev neeg. Kuv niaj hnub thov
Vajtswv pab koj thiab tos ntsoov hnub hais tias koj twb mus koom ib pawg
ntseeg uas yog cov ntseeg qhov tseeb lawm.
Xh. Tooj Zoo Vaj question-answer@hbna.org |