TUS SAU ZAJ NO YOG XIBHWB TOOJ ZOO VAJ
Hnub tim 1 thaum 12:00teev tavsu, xyoo 2000 kuv tau mus koom nkawm niamtxiv tshiab nyob ntawm daim duab no rooj tshoob. Kuv pom nkawd muab ob nti nplhaib los chob rau ntawm ntivtes thiab nkawd sib cog lus rau Vajtswv tus uas muaj txojsia nyob hais tias "Kuv yuav hlub koj, tsis hais thaum muaj, txomnyem, thaum tau zoo, thiab muaj kev txhawj xeeb. Kuv yuavnyob ti koj thiab hlub koj mus txog hnub tus tswv Yexus rov qab los"
Thaum kuv hnov zaj no, kuv pom muaj ntau nkawm niamtxiv yeej txawj sib hlub li cog lus tiag, tiamsis muaj ib txhia kuj lam dag xwb. Yog li kuv thiaj li xav tias yuav tau sau yampuav cia rau sawvdaws tau nyeem seb puas muaj qhov pab tau tej nkawm niamtxiv lub neej.
KEV HLUB Lub NtsiabYog Licas Tiag ?
Tej txiv hmab txiv ntoo uas poob hauv tej qab ntoos thiab muag hauv kiab khw. Thaum yus saib pom sab nraud yeej zoo nkauj thiab ntxim qab heev. Tiamsis thaum yus muab phua kiag los xyuas sab hauv, yus thiaj pom tias muaj ntau lub tsuas zoo sab nraud xwb. Sab nraud ntxim qab diam, tiamsis sab hauv lwj thiab kas puv nkaus. Tej txiv ntawd qhia kom peb txawj nkag siab txog peb lub neej.
Muaj coob leej zoo nkauj zoo nraug kawg li. Tiamsis lub siab phem kawg nkaus. Tus uas yuam kev tau tus zoo li no los ua neej mas lub caij nyoog ntev kawg lis. Tus zoo li no, nws yeej pheej niaj hnub pom lwm tus tsis hlub nws xwb, nws yeej tsis pom tias nws tsis tau hlub lwm tus li. Muaj tsawg tus uas pheej ntshai nyob tsam nws tsis txawj hlub lwm tus txaus ces thiaj pheej nrhiav kev kawm ntxiv. Dua li ces yeej qhuas tias thaum niam thiab txiv yug los yeej txawj txawj lawm.
Txoj kev hlub yeej tseemceeb tshaj dua li lwm yam. Kev hlub tsis yog kev muaj txiag npluanuj, kev txawj ntse, thiab kev nom kev tswv. Muaj coob leej xav tias kev hlub yog tej no. Vim li, lawv thiaj li muab lawv tej tub ntxhais yuam mus nrog tej tus no ua neej. Qhov kawg yeej tsis tau neej zoo ua, tsuas tabtom tau mus ua lawv tus thawj qhev xwb.
Lo lus "HLUB" coob tus yeej txawj hais. Tiamsis tsis muaj ntau leej txawj siv thiab ua. Paub tias yeej tsis yooj yim, tiamsis kuj tsis yog yuav ua tsis tau li.
Ua ntej ntawm yuav pib piav zaj no kom tob mus, xav kom nco tias "HLUB" tsis yog yam tsuas hais ntawm ncauj xwb. Tiamsis yog yam uas txawm tsa muag ntsia los yee pom, xuas tes kov los tau, xua pob ntseg mloog los hnov, thiab muab siab npuab los sov mas thiaj li yog hlub tiag.
Nimno tib neeg lub neej zoo li tej zaub cog hauv nruab teb. Tej zaub ntawd yeej yuav tau rau chiv thiaj li yuav loj zoo vim av pib tsuag lawm zujzus. Tej kev hlub uas niam thiab txiv yug nrog los siv tsis tshua tau lawm, yuav tau kawm ntxiv tiag tiag mas thiaj li yuav siv tau mentsis.
Tus uas muaj lub siab hlub tiag tsis yog tus nws pheej thov kom lwm tus hlub nws. Tiamsis yog tus nws pheej thov ntsoov xav hlub lwm tus. Nws tsis nyiam hais tias "ua cas koj tsis hlub kuv li". Tiamsis nws nyiam niaj hnub hais tias "ua cas zoo li kuv pheej hlub koj tsis txaus". Tus uas nws pheej hais tias lwm tus tsis hlub nws, tus ntawd yeej tsis paub tias kev hlub yog dabtsi tiag. Kev hlub yog qhov koj twb xub hlub lwm tus lawm es thaum lwm tus tau txais koj txoj kev hlub txaus es mam ntws rov los rau koj, qhov ntawd thiaj li yog koj tug tiag tiag.
Muaj coob leej lawv xav tias yog yus muab niam thiab txiv los yog me tub me nyuam suav ua yus tus # 1 ntawm yus lub neej. Tiamsis raws li kev soj ntsuam mas 95% neeg ntseeg hais tias yus tus pojniam thiab tus txiv yog yus tus #1 ntawm yus lub neej uas tsim nyog yuavtsum tau xyuam xim tiag. Yog hais txog zaj no yus kuj nkag siab tias qhov ntawd yuav yog lawm tiag. Vim yus yeej pom muaj ntau nkawm tub ntxhais sib caum ua txij nkawm niam thiab txiv yeej cheem tsis tau. Peb kuj pom ntxiv ntau tus pojniam thiab txiv neej uas muaj tub ki coob, tiamsis thaum tsis muaj txijnkawm lawm ces nws cia tso tej sob menyuam uas ntxim hlub kawg tseg. Dua li peb kum pom coob tus uas yav dhau los thaum nws tseem muaj txij nkawm, nws yog neeg tseem ceeb thiab coj plaub tuav ntug. Tiamsis thaum tsis muaj txij nkawm lawm, nws cia li txia tau ua tus neeg dog dig uas nyob tsis muaj vag muaj tse thiab luag muaj noj muaj haus los tsis xav hu nws lawm. Yog li kuj qhia tau tias qhov uas yus tsheej tau ua neeg tseemceeb yeej yog vim yus tus txij tus nkawm nrog txhawb. Vim li nws thiaj yog tus yuav tsum yog yus tus #1. Kuv pom muaj ntau tus pojniam nom uas thaum ub muaj tub mab tub qhe coob. Tiamsis thaum tas tus txiv lawm, tej tub mab tub qhe ntawd ntag yog cov tig ua saib tsis tau tej pojniam ntawd. Los lus xaus thiaj li hais tias "leejtwg ua rau yus vws taus ces tus ntawd ntag yog yus tus #1).
Yog koj yog nkawm niamtxiv uas yeej txawj sibhlub heev lawm los thov ua siab ntev nyeem zaj no es nrog tawm tswv yim sau zaj no kom zoo dua qub ntxiv rau lwm tus tau kawm. Yog koj yog nkawm uas lub neej tabtom yuav piamsij txogtes los txhob rawm maj. Cia ua siab ntev nyeem mus seb puas muaj qhov pab tau neb kom rov txawj sib hlub. Peb txhob rawm ntseeg tias nimno yog cia yus rov muaj caij mus nrhiav tus tshiab ces yus yuav txawj nrhiav dua qub. Nco ntsoov tias txhua lub neej hluas yeej yog neej qaus muag thiab tsis muaj ib tug yuav txawj nrhiav tshaj tshaj ib tug.Txawm yog koj yog tus laus taws los yog hnub koj tsis muaj txiv nkawm ces koj yeej rov zoo li cov hluas uas nyuam qhuav hlob lawm xwb. Txawm yog tus qub uas nimno koj dhuav heev los thaum ub koj yeej xaiv kawg zog li lawm. Yog koj tso kiag tus no tseg, hnub puav rov tig ntsia koj yuav khuv xim. Thaum nyob deb ces txhua tus yeej puav leej zoo, tiamsis thaum nyob ze ces tsawg tus xwb thiaj li zoo. Tus uas tau tus zoo yeej tsis yog nws txawj xaiv, tiamsis yog nws hmoov zoo nkaus xwb. Nyaj koj twb pom tej pojniam los yog txiv neej uas ib nyuag ntu dhau los nws nyob tug ntxhov hauv tsawv li tus txiv thais liab lossis li niag poj ntxoog. Tiamsis tamsim no nws hloov lawm, nws tsab zam zis ua tus zoo kawg kiag. Koj puas paub nws ua li ntawd ua dabtsi? Twb yog nws yuav caws nws rooj ntxiab tos cov neeg dig muag uas tseem tabtom vwm vwm kom mus mag ntag.
Nyob hauv Vajtswv phau ntawv 1 Khaulithaus 13:13 hais cia tias txawm yog leej twg yuav ua yam twg los xij. Tiamsis txhua yam yeej puav leej yuav ploj mus. Tsuas tshuav 3 yam thiaj li yuav nyob mus ib txhis xwb. Peb yam uas yuav nyob mus ib txhis yog (1) Kev sib ntseeg siab (2) Kev sib cia siab (3) Kev sib hlub, tiamsis kuv hlub yog qhov tseemceeb tshaj plaws.
Kev hlub yog qhov tseem ceeb tshaj plaws txhua yam.
Kev hlub, yog cov chiv uas coj los ywg tej qoob loo hauv nruab teb kom hlob ntsuab xwb xiab mos nyoos.
Kev hlub yog hauv kuab muaj tsuag uas cawm tib neeg kom muaj txoj sia ntev.
Yog peb ua tib zoo ntsia peb yuav pom tias, tus neeg uas muaj lwm tus hlub nws thiab tus tsis muaj, nkawd ob lub ntsej muag yeej txawv. Tus tau txais kev hlub, nws lub ntsej muag mos nyoos thiab tshiab khiv. Txawm yog kev mob nkeeg los yuav los tsis ze nws thiab nws yuav nyob luag ntxhi dhia rhees yam muaj zog zis. Nws lub siab tsis tau muaj ib qhov twg puas, tiamsis txhua nreej siab puas leej nyob khov khov. Nws tsis seev tsis npaj tias yuav tuag. Yog li tej kab mob uas los ncaj yuav tsis muaj peevxwm nkag tau los siv nws lub cev kom nws muaj mob.
Tus uas tsis muaj tus hlub nws yuav ua neeg ntsuj ntsoos zoo li pheej sab sab thiab tsis muaj hnub los siav. Nws yuav tsis muaj ntsej muag nrog tej phoojywg luag. Nws lub ntsej muag yuav khub khawv thiab qhuav qhawv ib yam li cov neeg haus yajyeeb los yog haus luamyeeb. Nws lub siab puas tsus, nws seevyees txoj kev tuag thiab qhib qhov rooj lub rau kab mob kag los xiv nws lub cev ua chaw so. Txawm yog kab mob tsis los los muaj ntau zaus nws tseem thov kom los vim nws xav tiag tej zaum tuag zoo dua li ua neej nyob nrog kua muag.
Lub neej uas tsis muaj kev hlub, zoo li tus ntses uas muab thau tawm hauv dej coj los ziab tshav saum nruab nqhuab thiab zoo li tus kaus ntoo uas tuaj hauv qabtxag es tsis tau duab tshav ntuj. Kuv nco tau thaud kuv tseem yau hnub nyoog li 8 xyoos xwb. Thaum ntawm peb tseem nyob rau tebchaws Lostsuas. Peb kuj txomnyem thiab thaum ntawd peb Hmoob lub tsev yeej cia li ua rau saum npoo av xwb. Muaj ib lub noob taum poob rau hauv kuv lub qab txag. Tus kaus taum cia li tuaj hauv qabtxag. Kuv pom tus kaus taum ntawd tsis ua nplooj li. Nws cia li ua ib tug kav dawb dawb thiab ncaj nraim mus nrhiav tau ib lub qhov tsev meme thiab txim dua sab nrau zoo lawm. Thaum nws lub ntsis tawm mus pom pom kiag tus duab hnub lawm nws mam zoo siab pib ncau thawj daim me nplooj thiab pib tawg paj txi txiv.Kuv thiaj mas paub tias tus me cag hmab ntawd nws ntshaw tus duab tshaj ntuj kawg nkaus. Nws yeej tsis zoo siab ua nws lub me neej txog thaum nws rua nws lub qhov muag mus pom lub hnub uas ua rau nws pom kev thiab qhia rau nws tias yuav tsis muaj tsaus ntuj lawm. Kuv thiaj nkag siab tias tus uas tsis tau txais kev hlub ntshe nws yuav ntshaw tib yam li tsob me hmab no. Nws yuav tsis zoo siab ua nws lub neej vim nws tig ntsia qhov twg los pheej tsaus ntuj nti. Nws tos ntsoov tias lub qhov tsev twg puas hlub nws es pub kom nws muaj caij pom tau lub hnub uas yog txoj kev hlub cawm nws txij sia. Nws nqhis thiab ntshaw tus hlub nws tib yam li tsob me hmab uas nqhis thiab ntxhaw lub qhov tsev ua rau nws pom kev.
Yog ib tug neeg uas rhiav tsis tau tus hlub nws ntshe nws yuav tus siab tag sim neej. Thaum nws pom luag tej txawj sib hlub ntshe nws yuav ntshaw ua lub kua muag teev yees. Vim li kuv muaj ib tug phoojywg, nws ua haujlwm rau hauv lub tsev hlawv neeg tuag. Nws hais tias muaj ib co neeg tuag mas qhov txhia chaw kub nyhiab tag pheej tshuav lub siab kub nyhiab tsis tag. Yog li kuv thiaj li xav tias tsam cov uas nws tiam neej tsis muaj tus hlub yog cov lub siab tsis kub nyhiab ntawd ntag.
???......HLUB, HLUB, HLUB yog licas tiag?
Hlub yog muaj peevxwm sib cawm tau txoj sia.
Nyob hauv Vajtswv phau ntawv Yauhas 15:13, Tswv Yexus hais rau nws cov thawj tim hais tias, tus uas muaj lub siab hlub tiag nws muaj peevxwm muab tau nws txojsia theej nws tus npawg lub txhoj. Thaum Tswv Yexus hais li no tas, nws zoo siab muab nws txoj sia dai rau saum tus ntoo khaub lig theej txhua tus tib neeg lub txhoj lawm tiag. Yog li qhov ntawd yog ib tug qauv qhia rau tus uas muaj siab hlub tias yuav tsum muaj peevxwm ua tau li ntawd thiaj li yog.
Nyob rau nroog St.Paul muaj ob peb zaj uas hais txog zaj no li nram no:
1. Tsis ntev dhau los no, muaj ib tug ntxhais hu ua Maiv Neeb Muas, nws lub raum tsis ua haujlwm lawm. Nws niaj hnub mus lim ntshav lawm xwb. Muaj ib tug tub Amelikas hu ua Erick tuaj pom Maiv Neeb txom nyem heev kawg lis. Yog li tus tub ntawd cia li kam muab nws lub raum rau tus ntxhais Maiv Neeb. Nws hais tias yus kam muaj ob lub raum diam es yuav cia ib tug neeg uas yus paub txom nyem npaum li ntawd yeej tsis tau. Nws zoo siab faib ib lub rau Maiv Neeb lawm tiag tiag. Nws zoo siab tso dejnum ib lub hlis ntau tseg los ntoog mob es tsuav Maiv Neeb tau raum xwb. Nws niam thiab nws txiv kuj zoo siab so dejnum ib lub hlis los tus nkawd tus tub uas zoo siab muab nws lub raum rau Maiv Neeb thiab.
Zaj no tsis yog hais tias Erick thiab Maiv Neeb nkawd yog hluas nkauj hluas nraug, nkawd tsuas sib paub xwb.
2. Muaj ib nkawm niam txiv Hmoob Vaj, nkawm no twb yog ib nrab neej lawm. Thaum tus niam tseem nyuam qhuav pib mob thiab tsis tau paub tseeb tias yog mob raum. Tus txiv hais rau coob tus hnov tias, yog nws pojniam lub raum puas lawm tiag, nws zoo siab muab nws lub rau nws pojniam. Tiamsis thaum kws tshuaj qhia tseeb tias nws pojniam lub raum puas lawm tiag ces nws txawm cia li hais ub hais no thiab tsis kam lawm. Thaum nws hais tias nws kam muab nws lub raum rau nws pojniam, kuj ua rau tsoom txiv neej nrog hnov ntawm nrog nws tau ntsej muag ib nyuag ntus. Tiamsis hnub uas nws cia li tsis kam lawm, kuj uas rau sawvdaws tau poob ntsej muag heev.
3. Ib nkawm ntxiv mas yog tus txiv ho mob raum, tus txiv neej no thaum ub nws muaj ob tug pojniam. Tus txiv cia li tso niam hlob tseg es nrog niamyau ua neej txog rau thaum me tub menyuam cuag zog tag. Tsis ntev dhau los ntawd tus txiv cia li ho mob raum. Tus txiv tau taij seb tus niam puas kam nws lub raum rau nws. Tiamsis tus niam cia li hais ncaj qha hais tias tus txiv txoj kev hlub pojniam yav dhau los tsis tsim nyog nws yuav muab tau nws lub raum pub dawb do rau tus txiv. Ua rau tus txiv kua muag teev yees rau coob leej pom. Tomqab no ua ciav tus txiv lub rau cia li txawj rov zoo tuaj yam tsis tau mus lim ntshav li.
Yog piav txog tej no mas yeej muaj tsos xav tsis thoob rau peb tsoom Hmoob lub neej sib hlub. Yeej tsis yog cov txiv tsis hlub cov niam xwb. Tiamsis cov pojniam los yeej tsis hlub cov txiv tib yam thiab. Tsis tag li txawm yog niamtub, txivtub, kwvtij niamtxiv ib plab, thiab txijnkawm nkauj txhav qaib nraug txhav noog los ib leeg yeej tsis kam cawm ib leeg. Sawvdaws yeej cia tos thaum txojsia tu lawm ces mam li mus quaj nkoov nkoov hais tias " kheev lam hloov tau es cia kuv mus es koj nyob" . Tej no tsuas yog lam ua li kom lwm tus qhuas nkaus xwb xwb qhov tseeb yeej tsis hlub tiag tiag. Raws li pom mas luag lwm haiv neeg kev hlub yeej tob dua peb Hmoob tiag.
Yog koj hnob zaj no thiab koj lees tias koj yog ib tug uas muaj siab hlub tiag koj xav li cas? Koj puas hais tau rau tus koj hlub hais tias "txij no mus kuv txoj sia yog koj txoj, yog koj muaj ib yam ntawm koj lub cev tsis zoo lawm es yog kuv muaj ib yam yuav faib tau rau koj, kuv yeej zoo siab muab kiag rau koj". Yog yus hais tias yus hlub luag, tiamsis yus ho hais tsis tau tias yus muaj peevxwm pub tau txoj sia tus uas yus hlub. Tus zoo li ntawd qhov uas nws hais tias nws hlub lwm tus yeej tsis tseem ceeb dabtsi. Tej lus uas tus ntawd hais yeej zoo li suab tswb nyuj tswb nees uas nrov tsis muaj lub muaj log xwb (1 Khaulithaus 13:1-3). Yog yus hais tsis tau li ntawd rau nws es nws ho pom muaj lwm tus hais tau li ntawd rau nws, koj puas xav tias nws yuav cia siab rau leejtwg dua? Muaj ntau nkawm niamtxiv lam nyob uake ua cavlwj sib ib laus taws, tiamsis yog nug, nkawd yeej teb tsis tau tias kev sib hlub yog dabtsi tiag. Tsis tas li, muaj ntau leej txawm laus lawm los yog nug txog zaj no, nws lub kua muag tseem si lawm. Yog nkawm twb muaj lub neej zoo li no, qhov nkawd los nyob uake laus nkoos ntawm ho muaj nuj nqis dabtsi? Yeej tsis muaj, nkawd tsuas yog lam los nyob uake koj siv kuv kuv siv koj los txog thaum laus xwb. Nyob hauv nkawd lub siab yeej nyoos txias. Tiam no ces tag kev ciasiab lawm tsuas yog pheej lam cia siab rau lwmtiam nkaus xwb.
Hlub tiag yog tsis muaj lub siab quabyuam thiab lim hiam.
1. Tus txiv uas tsis limhiam rau nws tus niam.
Zaj no kuv xav hais ntau zog rau cov ua txiv neej vim kuv pom peb cov uas yog txiv ntau leej muaj ntsis lim hiam.
Vajtswv txoj lus nyob ntawm Efexaus 5:25-28 qhia cia li no:
25 Nej cov uas yog txiv nyias yuav tsum hlub nyias tus pojniam ib yam nkaus li Yexus Khetos hlub cov ntseeg, thiab nws muab nws lub cev los txhiv cov ntseeg.
26 Nws muab dej thiab nws txojlus ntxuav cov ntseeg kom zoo kawg nkaus pub rau Vajtswv.
27 Nws ua li ntawd nws thiaj tau cov ntseeg zoo nkauj, zoo kawg nkaus tsis muaj ib qho txhaum, tsis ceb tsis txoom thiab tsis muaj ib qho phem li ua nws tug.
28 Tus txiv, nws yuav tsum hlub nws tus pojniam ib yam li nws hlub nws lub cev. Tus uas hlub nws tus pojniam tus ntawd nws yeej hlub nws lub cev.
Pajniam lub siab yog ib lub uas muag, mos, poobsiab, thiab tshai sai dua tsiv neej. Vim li thaum lawv hlob los lawv yeej pheej xav tias lawv nyob ib leeg tsis tau yuavtsum muaj tus txiv ua lawv qhov chaw tso siab. Txawm yog lawv yuav hlob hauv tsev neeg npluanuj, txomnyem, thiab ruam los yog ntse los lawv yeej xav ntsoov tias yuavtsum muajtxiv ib hnub thiaj li yuav zoo. Kuj muaj ntau leej ntxhais, thaum lawv yog ntxhais ntsuag nos los sis lawv tsev neeg yog tsev uas muaj tej nus thiab vivncaus coob es niam thiab txiv hlub tsis cuag ncua. Lawv ntshaw kev hlub kawg nkaus, yog muaj ib tug lam hais tias yuav coj lawv mus hlub no mas zoo lawv siab kawg li. Txawm yog tus ntawd yuav laus thiab hluas los lawv cia li yuav lawm los muaj.
Qhov lawv mus yuav txiv, lawv yeej ntsaw tus ki ib nyam li luag lwm leej lwm tus. Tiamsis lawv yeej ho tsis ntsaw ntau npaum li niaj hnub nimno muaj coob tus txiv neej xav thiab pheej muab noob menyuam rau tej pojniam uas twb nyoo lawm.
Ib tsoom uas yog txiv es, ua cas peb muaj ib txhia thiaj pheej ntseeg tias pojniam lub neej ces yog yuav los yug menyuam rau yus xwb. Yeej tsim nyog peb cov ua txiv paub tias zaj plab uas peb cov pojniam mob thaum tau menyuam heev npaum li cas diam tiag, kom peb thiaj li paub hlub lawv. Thaum ntawd lawv twb zoo siab tso kiag lawv txojsia tseg es ncaim lub ntiajteb thiab peb cov ua txiv mus tiam. Tiamsis Vajtswv tsis tau pomzoo es lawv rua muag los thiaj tseem pom peb xwb. Txawm yog mob npaum li ntawd los vim peb txoj kev ntshaw lawv, lawv thiaj tseem zoo siab muab txoj sia pauv es tsuav txaus peb siab yam tsis nroo ib los xwb. Xav kom peb paub tias, cov pojniam muaj menyuam coob coob lawv nyuab siab npaum li cas diam. Suav txij thaum lawv paub tias lawv lub cev txawv lawm es tsam yog lam xeeb tus lawm ces lawv yeej pw tsis tsaug zog mus txog hnub uas lawv zaj mob dhau tas. Txawm yog li ntawd los peb muaj ntau tus txiv neej tsis paub ces yeej tsis pub kom lawv muaj chaw kaj siab. Peb muab lawv siv li thaj liaj uas yeej tsis cia so thiab ib xyoos yuavtsum ua kom tau nplej ntau cim. Yog li ntawd peb ua dhau zog rau rau tej yam tsis tshua yog lawm.
Peb cov txivneej cov ntsaw menyuam yeej muaj thiab, tiamsis cov coob yeej yog limhiam ntau. Yog peb leejtwg yog tus yeej ntshaw menyuam tiag, yeej tsim nyog yus ob leeg ua twbzoo zaum tham es cia muaj npaum li ob leeg ntshaw xwb yuav zoo. Dhau ntawd tsis txhob ruam ruam, yuav tsum thawj kws kom yus lub neej muaj sijhawm tabseeb li luag teb luag chaw thiab thiaj li yuav tsim nyog. Yog leej twg lam limhiam thiab tsuas xav txog tus kheej xwb, hnub no xav kom tig los mloog. Peb yog txiv neej ib yam, peb yeej paub tias cov txiv neej uas pheej tseb noob menyuam heev. Cov ntawd hajyam yog cov neeg uas muaj ntsis nkees thiab muaj ntau zaus lawv twb tsis lees paub lub noob uas lawv tseb rau hauv daim teb es tabtom tuaj kaus. Muaj ntau leej tseem hais tias daim teb yog daim txhaum. Daim teb yeej tsis txhaum, tus txhaum tiag yog tus tseb noob rau hauv daim teb ntawd. Peb yuav tau paub tias peb tej pojniam muaj coob tus thev tsis taus tej no lawm thiab lawv lub kua muag niaj hnub poob. Txawm li los lawv tseem hlub peb thiab lawv xav nrog peb ua twb zoo tham kom nkag siab txog zaj no. Peb muaj coob tus ua neeg tsivtsaim thiab lim hiam. Yog peb tej pojniam cheem peb txog zaj no ces txawm yuav mus nrhiav thaj teb tshiab tseb noob xwb. Peb yog txiv neej tib yam, yog leejtwg coj li ntawd, peb yeej hais tau tias tus ntawd yog tus limhiam thiab tsis paub qab paub hau dabtsi. Txawm yog yuav kawm tiav qib siab, muaj nyiaj ntau, thiab ua nom loj los yeej tsis tseemceeb. Muaj ntau zaus ib txhia yuav teb li tej Hmoob uas tseem nyob puag saum laj roob lub siab hais tias "yus poj yus sev, yus nqis peev yuav los, yus yuav ua li cas yeej yog yus haujlwm". Yeej yooj yim yus hais li ntawd rau luag tej ntxhais uas tsis mob yus plab yug. Tiamsis yuav tsis yooj yim rau luag hais li ntawd rau yus tej ntxhais uas mob yus plab yug. Yog yus ntseeg tiag tiag hais tias ib lub taub hau neeg yeej tsuas raug nqi npaum li ntawd xwb. Yus sim rho hlo riam muab kiag ib niag neeg hno kom tuag es nqa qhov nyuag nyiaj ntawd mus them tus ntawm niam thiab txiv los yog tej nomtswv seb puas yuav tag plaub. Tiamsis qhov tseeb neeg lub nqi taub hau yeej tsis muaj leej twg yuav them. Neeg tej kev ua tshoob uakos uas tau ntxhais tau vauv, tau tub tau nyab, thiab tau neej tau tsav lam muab tej ntawd los ua lub nyuag qe raws kev raws cai xwb.
Xyoo 1994 peb sawvdaws hnov thiab pom ntawv xovxwm tawm hais tias muaj ib tug txiv neej Amelikas dub hu ua Auntses. Nws txhom nws pojniam ibhnub 5 zaug diam. Tej tib neeg thoob qab ntuj suav tau tias Auntses yog tus limhiam heev rau nws pojniam. Tiamsis nimno peb tseem ho hnov tias peb cov Hmoob tseem muaj tus txhom pojniam ibhnub twg nto 14 zaug thiab yuav ua kom pojniam zuas qe tag kiag mas thiaj li tsum xwb. Thaum hnob li no peb cov ua txiv neej kuj tau chaw txaj muag kawg li thiab xav tsis thoob.
Lub neej txiv neej yawg tiag tiag tsis yog heev qhov cog noob menyuam thiab tsa hau siab siab xam seb tej maum qaib qus nyob qhov twg xwb. Tus uas yog txiv neej yawg thiab zej zog hwm tiag yeej yog tus txawj xav, paub siab paub qis, muaj lub siab mos siab muag, thiab paub hlub lwm tus lub cev ib yam li hlub nws tus kheej lub. Koj puas txawj hlub koj lub cev nab? Vajtswv txoj lus yeej xaus meej tias yog koj txawj hlub koj lub cev, koj yeej yuav txawj hlub koj tus pojniam lub thiab vim neb yog tib lub cev lawm xwb. Koj puas tau sim muab ib rab maum koob los nkaug koj lub pob tw es mloog seb puas mob lossis zoo zoo mloog heev. Yog mob, tej koj ua rau tus uas koom koj lub cev yeej mob nws kawg li lawm. Koj puas paub ntxiv hais tias pojniam lub siab tsis zoo li txiv neej lub thiab pojniam tsis xav li txiv neej xav? Lawv lub siab mos thiab nyias kawg nkaus. Yog hais txog txog tsob ntoo, txiv neej xub xav txog tsob ntoo lub hauvpaus ua ntej. Tiamsis pojniam ho xub xav txog tsob ntoo lub ntsis, cov paj thiab cov txiv ntoo uantej. Kuv hais li no yog txhais li cas? Kuv hais li no yog txhais hais tias, txivneej lub siab thiab lub hlwb mas yog yuav kom nws txaus siab hlo nrog pojniam mus ncig hauv khw yuav khaub ncaws mas yuavtsum yog nkawd xub pw uake tag tso. Tiamsis pojniam li nws lub hlwb thiab lub cev mas ho txawv. Yuavkom nws txaus siab rog txiv neej pw mas yog yuavtsum xub nrog nws mus ncig yuav ris tsho kom txaus txaus mas dhau ntawd nws thiaj li txaus siab. Vim li no yog tus pojniam twg tsis paub txiv neej lub siab thiab tus txiv neej twg tsis paub pojniam lub siab ces txhua yam yeej yuav yuam kev txog rau theem nkawd muab lub neej ncuav rau hauv hiav txwv los nkawd yeej tsis paub tias yog vim li cas li.
Yog li yeej tsim nyog cov txiv paub cov niam lub siab thiab cov niam paub cov txiv lub siab.
2. Tus pojniam uas hwm nws tus txiv
Hais li pem no tsis yog tias tus txiv thiaj li yuavtsum hwm tus niam xwb. Tiamsis tus niam los yuav tsum hwm tus txiv thiab saib taus nws tsaj tiab.
Peb cov Hmoob tej pojniam muaj ib txhia xav hais tias yav dhau los cov txiv neej Hmoob yeej pheej muab lawv tsuj tag li xwb. Nimno lawv tuaj txog tebchaw no, lawv yog cov muaj cai thiab yeej ua tau txhua yam rau lawv tej txiv uas tsis muaj tus yuav txwv tau lawv.
Nimno yog yuav hais txog hwchim thiab txoj kevcai ces yeej hais tsis paub tag. Tiamsis qhov tseeb peb yog cov ntseeg Vajtswv thiab nws yeej muaj nws txoj lus qhia kom cov ntseeg uas xav mus nyob nws lub ntuj ceebtsheej coj thiab ua kom raws nkaus.
Vajtswv txoj lus yeej qhia meej tias Vajtswv yeej xub tsim tus txiv neej es mam li muab nws tus tav los puab ua tus pojniam. Tsis yogVajtswv muab tus pojniam tus tav los puav ua tus txiv. Vajtswv yeej tsim tus pojniam los rau tus txiv, tsis yog tsim tus txiv los rau tus pojniam. Tus txiv yeej muaj Vajtswv lub hwjxyeej thiab tus niam muaj tus txiv lub hwvxyeej ( Chk.2:21-24 ;1Kth 11:7-9). Tus txiv yeej yog tus pojniam lub taubhau, Yexus yog tus txiv lub taubhau, thiab Vajtswv yog Yexus lub taubhau (1Kth.11:3). Yeej tsim nyog tus pojniam mloog tus txiv lus ib yam li cov ntseeg mloog Vajtswv lus (Ef.5:21-24).
Yog peb xyuas raws li Vajtswv txojlus, peb yeej pom tias yeej tsim nyog tus niam mloog thiab ua raws li tus txiv tej lus txhua los uas nws hais yog. Yeej tsis yog Vajtswv txojlus hais xwb, tiamsis txawm yog peb neeg lub siab los yeej muaj tsos ntseeg tias txiv yeej yog tus tswv tsev (1Pt.3:5).Thaum tus pojniam yuav tau tus txiv, txhua haiv neeg cov pojniam yeej kam muab lawv lub xeem hloov ua tus txiv lub. Txawm yog lawv yuav pis tsawg tom txiv los lawv yeej zoo siab hloov npaum li ntawd zaus. Tsis tag li yog hmoov tsis zoo es tus txiv tau tso tus pojniam ntawd ua pojntsuam, nws yeej siv raws nws tus txiv lub npe txog hnub nws yuav tus tshiab mam li hloov xwb. Tus txiv lub npe yog lub tseemceeb thiab tsim txiaj kawg li, tej neeg ob cag uas saib taus lawv yeej tseem hu lawv lub npe raws li lawv tus txiv lub. Tsuas yog tus saib tsis taus lawv es thiaj li hu lawv lub npe hluas nkauj. Tus txiv neej uas hu tej poj ntsuam thiab nkauj fa tej npe hluas nkauj, nws yeej xav ua phem rau tej pojniam ntawd. Thaum nws hu li ntawd yog nws tabtom nrhiav seb puas muaj tus uas nyiam nrog nws ua kev plees yig. Tus pojniam uas nyiam kev plees yig yeej yuav teb ntua thiab luag ntxhi. Tiamsis tus tsim txiaj lub kua muag yeej yuav poob nthav thiab nco ntxog nws tus txiv lub hwjchim yv tag los. Txawm yog yus yuav ntse, zoo nkauj, thiab yav dhau los yus yog pojniam nom los, thaum dhau yus tus txiv lawm, tej neeg uas paub yus thiab ua yus qhev thaum tus txiv tseem nyob ntag yog cov paub yus siab thiab yuav xub thab yus ntag.
Yog li thiaj li xav kom tsoom pojniam muab tej no los khaws cia rau nruab siab es tig los mloog yus tus txiv tej lus thiab sib qaws ua lub neej nkauj txa qaib nraug txa noog kom txog hnub kawg.
Cia kuv piav ib zag uas muaj tseeb rau peb mloog. Kuv niam yog ib tug niamtsev uas siab zoo tshaj dua li coob tus niamtsev uas kuv paub nimno thiab yav dhau los. Thaum ub kuv niam thiab txiv nkawd tseem yau, nkawd yeej tsis tau sib nyiam. Tiamsis cov laus ciali muab nkawd los sib sau ua neej vim nkawd yog muam tub thiab nus ntxhais xwb. Tom qab no kuv txiv txawm mus yuav niam yau thiab tso kuv niam tseg ua ntsuag ciaj. Kuv pom nkawd lub neej cov nyom thaum kuv tseem yau, thaum kuv hlob los ces kuv txiv twb tso peb ua ntsuag ciaj lawm.
Raws li kuv paub mas kuv niam yog thawj tug uas los tsav kuvtxiv lub neej uas muaj koob los lawm thaum xub thawj. Cov niam tomqab no mam li los txais tuav kuv txiv lub neej ib nta mus xwb, tus uas muaj txiaj ntsim rau kwvtij neejtsa thaum pib ces yeej yog kuv niam.
Kuv niam thiab kuv txiv lawv txawm txiav tsim siab cia nyias nyob nyias. Tiamsis tsis sib nrauj, vim kuv niam muaj tub coob. Thaum kuv txiv thiab kuv niam nyias nyob nyias lawm kuv niam lub koob thiab lub npe txawm cia li ploj zuj zus thiab cia li nyob li tus poj ntsuam los sis tus nkauj qhev nyob hauv kuv txiv tsev lawm xwb.
Kuv lub qhov muag pom kiag. Muaj tej zaus uas luag muaj tej rooj noj haus tseemceeb es luag caw kuv txiv tuaj koom ua ntsej ua muag. Kuv ntsia ntsoov muaj tej zaum uas kuv txiv coj tsis tau peb niam yau, tus niam uas kuv txi v tseem nrog nraim nrog kuv txiv mus koom rooj noj rooj haus ntawd. Tiamsis kuv niam tus uas yog kuv txiv tus niam nkauj txhav qaib nraug txhav noog ho lam mus tom thawj rau ntawd. Txawm yog li ntawd los thaum luag hu kuv txiv mus zaum rooj qhov chaw tau ntsej muag, luag xam tsis pom kuv txiv tus niam uas tseem nrog kuv txiv rawv ces luag yeej cia kuv txiv nws zaum nws ib leeg twm zeej. Yeej tsis muaj leejtwg yuav nco qab lawm hais tias kuv niam tus uas ib txwm yog kuv txiv pojniam twb nyob ntawd. Luab cia li hais tias kuv txiv pojniam tsis tuaj. Txawm yog kuv txiv los yeej tsis nco qab txog kuv niam li lawm thiab.
Thaum kuv pom li no, kuv lub kua muag cia li poob twjywm, vim kuv paub tias kuv txiv yeej tsis tau nrauj kuv niam yam muaj ntaub ntawv zees ua cas kwvtij zej zog txawm cia li tso kuv niam tseg yam cuag li tuag lawm tiag.
Kuv lub kua muag ua rau kuv xav tau yam puav txhawb sawvdaws zog tias (1) tejj tub ntxhais uas tsis sib nyiam tsis txhob lam muab sib txis tsam lub qab nram ntsis tau lub neej zoo li kuv niam thiab kuv txiv lub (2) cov uas yog pojniam, tsim nyog yuav tsum ceev nej tej txiv zoo zoo, txhob lam cia lawv mus yuav lwm tus. Raws li kuv paub mas yog vim kuv niam zoo siab cia kuv txiv mus yuav niam yau es kuv niam tiaj tau txais lub neej uas twm zeej tsis nrog luag muaj txij muaj nkawm.(3) tsis txhob xav hais tias yog yus muaj tub ki coob ces txawm tsis muaj txiv lawm los yeej nyob taus. Kuv txiv cov niam puav leej muaj tub. Kuv niam yog tus muaj coob tshaj cov thiab kuj muaj cov tseemceeb. Txawm yog tias kuv niam yuav muaj cov tub tseemceeb npaum li cas los qhov ntawd yeej pab tsis tau. Tej pojniam uas tsis thim xav es xav tias yog yus muaj menyuam coob thiab tsim txiaj ces tej txiv yuav tig rov los nyoo yus ib hnub. Tej no tsis tseeb li sawvdaws xav. Nco ntsoov tias tej lus uas cov laus hais tias " 9 lub hnub qub tsis npaum ib txhais hli, 9 leeg tus tsis npaum ib leeg txi" lo no meej heev. Nimno kuv niam tej txiaj ntsim yeej tsis muaj tus nco qab txog, kuv niam lub neej yeej tsis yog pojnom lawm. Tiamsis zoo li tus poj qhev. (4) yeej tsis tsim nyog tej txivneej pheej yuav coob coob tus es cia tej pojniam uas yus twb tsis suav lawd pheej nyob li tej pojntsuam. Yog yus hlub tsis taus lawm yus yuavtsum muab nrauj mus kom nws thiaj muaj caij mus nrhiav tus uas yuav hlub nws. Pojniam thia txiv neej yeej puav leej muaj siab ntsws tib yam. Peb cov uas yog txiv neej sim xav seb. Yog nimno txog raulub caij uas cov pojniam muaj cai lawm es lawv pheej ib sij yuav ib niag los thiab ho tso hu ua ntsuag ciaj li ntawd ho puas yuav tau los tsis tau. Yaj sawvdaws twb hnov tias twb muaj coob tus txiv neej dai caj dab tuag lawm no los sav.
(( nyaj nej paub tias thaum kuv sau zaj no, kuv lub kuamuag twb poob los ntxaum daim ntawv uas nej tabtom nyeem no lawm, vim kuv hlub tej neeg uas ua ntsuag ciaj kawg li. Tsis xav kom phaum tom ntej no pom muaj li no lawm)). Thaum kuv tseem yau, kuv niam ua kab ua noog tu peb hlob, kuv cov tijlaug zoo li kuv txiv, coj peb mus luajteb ntov ntoo. Tiamsis kuv tsis pom kuv txiv, thaum luag hais tias kuv txiv yog tus ntawd ces kuv lam cia li hu xwb zoo li xyov puas yog tiag vim kuv tsis tau hlob ntawm nws lub xub ntiag. Thaum kuv tseem yau kuv ntshaw txiv heev vim xav kom muaj tus thaiv yus. Kuvnco muaj ib zaug kuv cov kwv uas yog niam yau cov tub thiab kuv sib txeeb kuv txiv. Kuv hais tias yog kuv txiv, lawv hais tias yog lawv txiv. Thaum kawg kuv swb vim lawv hais tias "yog koj txiv ua cas ho tsis thaiv koj es ho thaiv peb". Kuv ncontsoov kuv tau quaj ntawm peb qab tsag thiab niam yau lawv qhov rooj uas muaj ib lub pob seb kheej kheej. Yog xav txog zaj no, nimno txawm yog kuv twb laus lawm los kuv tseem nco thaj chaw ntawd zoo thiab kuv lub kua muag tseem pheej poob.
Txij thaum kuv yau los txog thaum kuv twb laus lawm los kuv pheej xav tsis thoob rau kuv niam lub neej vim kuv tsis paub qhov tseeb thiab pheej pom kuv niam zoo li tus pojntsuam. Kuv xav tias ntshe kuv niam yog ib tug neeg ruam heev uas luag hu tias "neeg tsis muaj siab muaj ntsws". Tiamsis tom qab no kuv hnov kuv niam hais tau ib daim xov roj hmab rau kuv tus kwv. Kuv mam muab los mloog. Kuvniam quaj kawg nkaus thiab piav kuv niam lub neej uas ua dab ua tsov luag es lam nyob vim txoj sia tsis tu. Kuv kuj nrog kuv niam tu siab kawg li thiab kuj nrog kuv niam quaj. Kuv thiaj li paub tias kuvniam yeej yog neeg muaj siab muaj ntsws ib yam li lwm leej lwm tus thiab.
Yeej lig heev lawm hais txog kuv niam lub neej vim tias peb phoob lub neej tej pojniam yeej zoo li ntawd ces kav liam. Tsuas yog kuv so kuv lub kua muag thiab thov Vajtswv tias kom kuv txhob poob rau lub neej zoo li no xwb.
Yog peb tsis txawj sib hlub ces txawm yog yuav ob peb tom los yeej tsis zoo. Txawm yus zoo siab losvtej menyuam yeej tsis zoo siab. Vim yus tau niam tau txiv los tej menyuam yeej tsis tsis tau. Yus ho txiav txim siab nyob ua ntsuag ciaj los zoo li lub neej tsis ciaj ncaig.
Tej uas yog niam, nco ntsoov txhob lam muab yus tej txiv lub npe rhuav uas yog tsis sib haum qho me ntsis xwb los pheej ib sij lam tau lam hu nomtswv tuaj coj tej txiv mus lojcuj kom rhuav ntseh rhuav muag. Txiv neej lub siab txawv li pojniam xav. Thaum yus thiab tus txiv muaj lus sib cav qho mentsis es nyias fee nyias lawm. Yog nws tig rov los cuag yus, yeej yog nws los thov txim ntawm yus lawm. Txiv neej yeej tsis tshua siv lub qhov ncauj hais tias "thovtxim". Tiamsis thaum koj pom nws tig rov los rau koj, txawm yog yuav chim npaum li cas los cia li zoo siab thiab rov ua zoo mas yog qhov tau koob hmoov tshaj. Yog txiv neej chim tiag thiab tsis hlub koj nws yeej tsis tig rov los rau koj ib zaug li lawm.
Muaj ib txhia pojniam tsis paub zaj no, nws xav tias thaum tej txiv neej tig los rau nws ces yog tig los tsim txom nws vim nyuam qhuav sib ceg tag. Yog li nws thiaj li hu nomtswv muab tus txiv coj mus rau hauv tsev lojcuj. Tej txiv neej ntau tus uas raug nws tus pojniam coj mus kaw hauv tsev lojcuj, lawv yeej tsis tau suav tias lawv ua txhaum. Lawv suav tias yog lawv tig los thov txim ntawm lawv tus pojniam xwb tsim nyog lawv tus pojniam siv hwjchim hu nom li ntawd.
Thaum tej txiv neej raug tej pojniam hu nomtswv coj lawv mus rau hauv tsev lojcuj li no tu lawv siab kawg nkaus li.
Yog li tsim nyog tej uas yog pojniam yuav tsum tau paub tias, yog muaj tej zaum yus tej niamtxiv sib yws qho mentsis es ib pliag zoj yus tus txiv tig rov los ua nkujnki rau yus, yeej yog nws los thov txim ntawm yus lawm. Tsim nyog yus zoo siab thiab zam txim rau nws. Txiv neej li coob leej yeej tsis los hais tias "kuv swb lawm es thov kom zam txim raukuv" Qhov nws thov txim ces yog nws tig los ua nkujnkis lawm xwb.
Yog koj tsis paub li no es koj cia li chim ntuj liab teb ntsuab thiab muab koj tus txiv coj mus kaw ces yog koj tabtom muab koj lub neej kaw. Thiab yog koj tsa tes ntaus koj tus txiv ces yog koj hu sub tawg sub ntsha los qhau koj lub neej. Yog li, txawm yog yuav chim npaum li cas los txhob lam tsa txhais tes ntaus yus tus txiv uas yog yus lub taubhau ib zaug. Tsev neeg uas muaj tus pojniam tsiv tsaim, luag ntiaj tog qaum pes yeej tsis qhuas ib zaug. Luag tsuas pheej thuam thiab tos ntsoov ntsia hnub uas pom nkawd muab nkawd lubneej nchuav kiag rau hauv dej xwb.
Muaj ib zag uas kuv xav tsis thoob yog li no. Tsis ntsev dhau los no muaj ib tug kwv kwvtij. Nws tus pojniam muab nws ntaus ib ce xiav tag. Nws ua nraug fav tuaj cuag nws niam thiab txiv. Hnub tom qab tus pojniam cav ho muaj plus tuaj hais tias nws ntaus li ntawd twb yog vim nws tus txiv tsis tsim txiaj es thiaj ntaus kom tsim txiaj xwb. Txog qhov kawg cav rov mus tsev yam niag poob ntsej muag kawg nkaus. Thaum kuv pom li no kuv thiaj xav tias ntshe lub ntiajteb no nyob ze rau ntu kawg lawm vim tej neeg ua Vajtswv tsim tig taw rov tuam Vajtswv lawm tiag.
Raws li kuv muab Vajtswv txojlus ua twb zoo los xyuas, kuv pom tias Vajtswv yeej pub nkawm niamtxiv muaj kev sib qhia txog kev coj noj ua. Tiamsis lub hwjchim Vajtswv yeej tsis tau tso rau tus niam hlo li. Yog li kuv ntseeg tias Vajtswv yuav hlub thiab pom zoo foom koobhmoov ntau rau nkawm uas txawj sibhlub thiab cia tus txiv ua tus niam lub taubhau ntau dua li nkawm uas cia tus niam ua lub taubhau. Kuv yog txiv neej, tiamsis kuv ntseeg tias tej pojniam uas paub Vajtswv txojlus zoo thiab muaj kev ntseeg zoo yuav ntseeg tej lus uas hnub no kuv qhia thiab khaws mus ua lub neej. Tiamsis tus pojniam uas tsivtsaim ntshe yuav chim heev kawg rau kuv.
Kuv nco qab thaum kuv yuav kuv pojniam, kuv niam tais hais rau kuv pojniam tias "mentxhais, nco ntsoov tias yus yog pojniam, yus tsis txhob tsawv yus lub hauvncoo siab tshaj li yus tus txiv lub, lub neej thiaj li yuav zoo mog" kuv xav tias tej zaum kuv pojniam yuav tseem nco lo lus ntawd thiab.
Kuv thov xaus lus tias txoj kev hlub sawvdaws yeej puav leej ntshaw. Tiamsis muaj coob leej tsuas paub ntshaw xwb tsis paub nrhiav. Yog li yuav nrhiav tau kev hlub qhov twg los? Kev hlub yuav ntws tau los ua yus tug los yuav tus yog:
1. Txawj pib SIB SAIB TAUS. 2. Txawj SIBHWM. 3. Mam li pib muaj KEV HLUB. 4. Thiaj li txawj SIBPAB. 5. Mam li kam SIBCAWM tau txojsia.
______________________________
Xh. Tooj Zoo Vaj yog tus sau zaj no thiab zaj no tseem sau tsis tau kawg. Yog nej lus nug txog zajno, nco ntsoov E-mail rau xibhwb Tooj Zoo Vaj tzv@hbna.org
Zaj no muaj nyob hauv CD, DVD,VHS. Yog xav tau thiab xav mloog ua ntej CLICK