Tus Naj Npaub Ib
                                                      By: Nyiaj Tsu Vaj

                                
Kuv yuav piav lub neej yav qub             yav thaum ub tsis tau muaj xis
Tag mus li ua neeg loj leeb                    suav tsis txeeb txoj kev cuav zos
Tsheej tag hmo los tsis txog tsev           tau los ntev neej zoo li no
Cas xav txog dhuav ua luaj li                 neej tsaus nti nyob kho siab heev
Niaj hnub seev nrhiav tus npawb ib       txij li ntsib paub tus hu xis
Ces cia li txawm muaj kev hlub               yav thaum ub tsis tau muaj los
Cas tos nco muaj cov lus tseeb                nyob nruab yeeb txawm tuaj nruab plawv
Nyob lub qawv sov so lub siab               tag ib txhiab yuav tsis thov ntxub
Yuav thov hlub mus tag ib txhis               tag mus li tsis pub ntshaw luag
Txawm tias pluag yuav txhawm kom tau   los pub rau koj tus kuv nyiam
Tag wb tiam yuav tsis thov tso               yuav thov nco tsis muaj hnub ploj
Txij tau koj neej tshav ntuj nrig              txij ntuj tig koj yog kuv tug
Kuv tsis nug tsis ntshaw tus tshiab           txawm koj ntiab los kuv kav liam
Vim kev nyiam ntawm kuv tsis ploj           txij muaj koj txog niaj hnub no
Cas tos nco zoo nraug tshaj qub                txawm nyiaj kub pauv tsis tau li
Koj tsim nqi zoo nkauj tshaj qub               zoo tshaj hnub tau koj los nyob
Kuv kev txob txhawj twb yaj ntshis               tsis tag li muaj npe laus zoo
Tej koob hmoo yog tus tswv nchuav            thov txhob rhuav ua twb zoo npaj
Koj zoo tshaj txhua tus poj niam                  tag wb tiam hlub koj ib tug
Koj los yug muaj tub muaj ntxhais               niaj hnub hais hu kuv ua txiv
Thov qhuas ntxiv vim koj siab ntev              wb lub tsev tab qhua tag li
Koj luag ntxhi ua lub sia b dav                     thov txho txav ncaim ntawm kuv mus
Muaj tej ntus kuv siab tsis zoo                     tsam koj nroo es ntshaw luag tug
Kuv thiaj nug koj nyiam dab tsi                    txawm raug nqi li cas kav liam
Tsuav koj nyiam thiab koj txaus siab           tag ib txhiab tsis pub koj chim
Tag ib sim tsis pub koj quaj                          txhua yam tuaj kuv ua koj txiv
Kuv yuav tiv txhua yam huv si                      tsaus ntuj nti tuav koj tes maub
Yuav thov ntsaub tsis muaj hnub tag            koj tias dag maj mam mloog mus
Ces ib ntus koj yeej yuav paub                     yuav to taub kuv txoj kev hlub
Uas niaj hnub loj hlob mus li                         tag ib txhis ua neej kaj siab
Tag ib txhiab tsis muaj hnub kawg                ntiaj teb tawg tuav koj tes rawv
Mus thov ntawv nrog tus tswv nyob               thiaj tsis txob nyob luag ntxhwb ntxhi
Tag mus li nyob mus kaj siab                         tag ib txhiab nyob tsis paub laus
Thiaj thov xaus tseg cia li no                          thov koj nco koj yog tus pib
Yog tus ib no mog xis e………..

Yuav tau 11 xyoos rau 3/5/93