Niam thiab Txiv Txoj Kev Cia Siab
By: Pov Xyooj
Ua neej nyob Vim kev vam khom
Thiaj tsim kom muaj tub muaj ntxhais
Txawm tsis hais los nej yeej paub
Yeej to taub lub neej thaum laus
Ua tsis taus yuav vam ntxhais tub
Tig los hlub es ua rau noj
Cas tu loj tseem mus loj leeb
Muab luam yeeb thiab Beer los ntxais
Tej tub ntxhais ib leeg ntxais pas
Lawv qhuas mas yog nom tswv qav
Muab los xav tu siab heev mog
Lub caij txog hnub Christmas tuaj
Luag tej muaj khoom plig los tev
Tub ntxhais dev nej coj li ko
Nej puas nco niam txiv kev hlub
Uas thaum ub tsau nej quav zis
Thaum nej nqhis tsuas paub quaj nrov
Niam txiv hnov muab mis nej noj
Niam txiv coj qhov qab los rau
Tsuav nej tau xwb luag yeem yoo
Txiaj ntsim zoo yog nej tsis nco
Muaj ib co yeej cuag tuag lawm
Kev vam ntawm niam txiv tu nrho
Tsis hnov lo Happy Mother’s Day
Father’s Day txiv tsis hnov li
Siab lwj dhi tub ntxhais puas paub
Txhob ua aub sib raws tsheej pab
Txhob nqa dab coj mus thawj dauj
Tiav hluas nkauj yog yus tsim txiaj
Niam txiv thiaj tsis poob ntsej muag
Txhob ua cuag yog khoom txom ncauj
Loj tiaj nkauj tsis tswj tus kheej
Ib hnub yeej yuav kho lub siab
Me ab liab tsis muaj txiv hu
Luag cem hu yam tsis txuag hlo
Ces thaum no yuav tu lub siab
Tag niaj txhiab ib txhis nawb mog………….